गान्तोक 25 अगस्त (हि.स.)। विद्या भारती सिक्किम प्रान्त अन्तर्गत पूर्व सिक्किमको नान्डोकमा नवनिर्मित सरस्वती संस्कार केन्द्र सफलतापूर्वक सञ्चालन भइरहेको छ। उक्त केन्द्र विद्या भारती सिक्किमका सहमन्त्री उमाकान्त शर्माको सक्रियता र देखरेखमा सञ्चालित छ।
विद्या भारती सिक्किमका संयोजक मोहन शर्मा र लिला शर्माको उपस्थितिमा आइतवार नान्डोक सरस्वती संस्कार केन्द्रमा एक विशेष कार्यक्रम सम्पन्न भयो। कार्यक्रममा संस्कार केन्द्रको सञ्चालन, उद्देश्य र भावी योजनासम्बन्धी विस्तृत जानकारी प्रदान गरियो।
विद्या भारती सिक्किमको मार्गदर्शन, प्रोत्साहन र आशीर्वादले यस केन्द्रलाई अझ प्रभावकारी, अनुशासित र मूल्याधारित शिक्षण–अधिगमको उत्कृष्ट केन्द्रका रूपमा विकसित गर्ने प्रेरणा प्राप्त भएको सहमन्त्री उमाकान्त शर्माले बताएका छन्।
उनले सरस्वती संस्कार केन्द्र परिवारको तर्फबाट सम्पूर्ण प्रान्तीय टोलीप्रति हार्दिक आभार व्यक्त गर्दै यस केन्द्रमार्फत बालबालिकामा संस्कार, शिक्षा र राष्ट्रिय चेतनाको उज्यालो फैलाउने संकल्प व्यक्त गरेका छन्।
हिन्दुस्थान समाचार / बिशाल
