पाकिम, 25 अगस्त (हि.स.)। सिलगढी ग्रेटर लायन्स नेत्रालयको आयोजनामा आज पाकिमको सामुदायिक भवनमा स्कूल एडप्सन कार्यक्रम सम्पन्न भयो। यस कार्यक्रममा मुख्य अतिथिको रूपमा पाकिम जिल्ला उपाध्यक्ष प्रभा प्रधान उपस्थित थिइन्। यस कार्यक्रमको मुख्य उद्देश्य सिक्किम राज्यका विद्यालयहरूमा बाल-बालिकाहरूको आँखा सम्बन्धित स्वास्थ्य सुनिश्चित गर्नु रहेको थियो।
मुख्य अतिथिले आफ्नो सम्बोधनमा यस प्रकारको कार्यक्रमले विद्यार्थीहरूको दृष्टि समस्यालाई सामाधान गर्ने बताइन्। उनले आज धरै मानिसहरू स्वास्थ समस्यासँग जुझिरहेको बेला यस प्रकारको कार्यक्रमले मानिसमा स्वास्थ्यसँग सम्बन्धित समस्याको समाधान गर्न सहयोग पुग्ने बताइन्। उनले यस प्रकारको कार्यक्रम पाकिम जिल्लाका सबै विद्यालयमा गरिनु पर्ने सुझाउ व्यक्त गर्दै सिलगढी ग्रेटर लायन्स नेत्रालयलाई पनि यसप्रकारको कार्यक्रम सम्पन्न गरेकोमा आभार प्रकट गरिन्।
यसरी नै निर्देशक अनि राष्ट्रिय नेत्रहीन तथा दृष्टि कमजोरी नियन्त्रण कार्यक्रमका राज्य कार्यक्रम अधिकारी डा. सङ्गीता प्रधानले आफ्नो सम्बोधनमा राष्ट्रिय स्वास्थ्य मिसन अन्तर्गत स्वास्थ्य तथा परिवार कल्याण विभाग अनि सिलगढी ग्रेटर लायन्स नेत्रालयको सहकार्यमा यो कार्यक्रम भएको बताइन्।
यसरी नै शिक्षा विभागका निर्देशक भक्तिप्रसाद शर्माले पनि यसप्रकारको कार्यक्रम जिल्लाका सबै पाठशालाहरूमा गर्न आवश्यक रहेको, जसबाट विद्यार्थीहरूले दृष्टि समस्याबारे जानकारी सँगै लाभ प्राप्त गर्न सक्ने बताइन्। उनले यसको निम्ति सिलगढी ग्रेटर लायन्स नेत्रालयलाई सहयोग गर्ने बताए।
यसरीनै स्कुल एडप्सन कार्यक्रमका प्रबन्धक सुमन दत्तले यस कार्यक्रमको उद्देश्यबारे जानकारी गराउँदै पाकिम जिल्लाका ४२ वटा सरकारी पाठशालाका ६६०७ जना विद्यार्थीहरूको नेत्र जाँच गरिसकेको बताए। उनले यो कार्यक्रम केवल एक पटकको निम्ति मात्र नभएर प्रत्येक साल गरिने अनि यसको निम्ति सबै विद्यालयहरूबाट सहयोगको खाँचो रहेको बताए।
यसै कार्यक्रमबीच पाकिम जिल्लाबाट (आई सक्रिनिङ) को निम्ति छनौट भएका केही पाठशालाहरू पीएमश्री डिकलिङ उच्च माध्यमिक पाठशाला, पीएमश्री रिनोक उच्च माध्यमिक पाठशाला, दक्षिण रिगू माध्यमिक पाठशाला, चानाटार माध्यमिक पाठशाला रम्फू, केपीपीटीएस रङ्गली, पाचेखानी माध्यमिक पाठशाला, पाचे उच्च माध्यमिक पाठशाला अनि सिस्ने प्राथमिक पाठशालालाई सम्मान जनाइयो। यसरीनै कार्यक्रममा पावरपोइन्ट प्रेजेनटेसन सँगै अन्तरक्रियात्मक सत्र पनि सम्पन्न भयो।
हिन्दुस्थान समाचार / बिशाल
