पासीघाट, 26 अगस्त (हि.स.)। गोर्खा संस्कृतिको सुरक्षा परिषद् (जीएसएसपी), पासीघाट, अरुणाचल प्रदेशले 25 अगस्त, 2025 मा दुई माइल, पासीघाटस्थित गोर्खा भवनमा अमर शहीद मेजर दुर्गा मल्लको स्मृतिमा बलिदान दिवस मनायो।
कार्यक्रममा प्रमुख अतिथि श्री श्री विद्यामन्दिरका प्राचार्य श्यामु अर्यालले मेजर दुर्गा मल्लको साहस र राष्ट्रप्रतिको निष्ठा आजका युवापुस्ताका लागि प्रेरणा भएको बताए। गोर्खा समुदायले सीमा सुरक्षादेखि शिक्षा, प्रशासन, खेलकुद र सामाजिक क्षेत्रमा पुर्याएको योगदानको पनि उल्लेख गर्दै युवाहरूलाई त्याग र देशभक्तिको आदर्शलाई आत्मसात् गर्न उनले आह्वान गरे।
अध्यक्षीय सम्बोधनमा जीएसएसपी अध्यक्ष चन्द्र थापाले बलिदान दिवसलाई प्रत्येक वर्ष मनाउनुपर्ने आवश्यकता औंल्याउँदै, गोर्खा समुदायको स्वतन्त्रता संग्राम तथा राष्ट्र निर्माणमा योगदानबारे सचेतना फैलाउने परिषद्को प्रतिबद्धता दोहोर्याए।
कार्यक्रममा गोर्खा संस्कृति सुरक्षा परिषदका मूल सचिव डेविड आले र उपाध्यक्ष टोपलाल शर्माले पनि बलिदान दिवस र मेजर दुर्गा मल्लको जीवनमाथि प्रकाश पार्दै आफ्नो वक्तव्य राखे। कार्यक्रम मेजर दुर्गा मल्लको स्मृति चिरकाल जीवित राख्ने र उहाँको साहस तथा बलिदानको कथाले भावी पुस्तालाई निरन्तर प्रेरणा दिने सामूहिक प्रतिज्ञाका साथ सम्पन्न भयो।
यस अवसरमा बिनी विश्वकर्माको नेतृत्वमा प्रस्तुत गरिएको खुकुरी नृत्य कार्यक्रमको मुख्य आकर्षण बनेको पासीघाट, अरुणाचल प्रदेशबाट फिराक गोर्खालीले जानकारी गराएका छन्।
हिन्दुस्थान समाचार / बिशाल
