नाम्ची, 26 अगस्त (हि.स.)। राज्य शिक्षा एवं खेलकुद तथा युवा मामिला विभाग मन्त्री राजु बस्नेतले याङगाङस्थित सिक्किम केन्द्रिय विश्वविद्यालयका भ्रमण गरेका छन्। शिक्षा मन्त्रीलाई सिक्किम विधानसभाकी उपाध्यक्ष राजकुमारी थापा, सिक्किम विश्वविद्यालयका उपकुलपति प्रोफेसर शान्तनु कुमार स्वैनले स्वागत जनाए।
यस अवसरमा शिक्षा मन्त्रीलाई जारी निर्माण कार्यहरूलाई लिएर विस्तृत प्रस्तुतिको माध्यमद्वारा जानकारी गराइयो। यसपछि, क्याम्पस र पूर्वाधार विकास गतिविधिहरूको जायजा लिन संयुक्त निरीक्षण गरिएको विधानसभा उपाध्यक्षको कार्यालयले आज प्रेस विज्ञप्तिमा जनाएको छ।
मन्त्री बस्नेतले समयमा निर्माण कार्य पूरा गर्न र विश्वविद्यालयको सुचारू सञ्चालनको लागि शिक्षा विभागको तर्फबाट पूर्ण समर्थनको प्रतिबद्धता व्यक्त गरे। राजधानीमा सञ्चालित विश्वविद्यालयका अन्य विभागहरू पनि चॉंडै याङगाङमा स्थानान्तरण गरिने जानकारी गराइएको छ।
उपकुलपति प्रोफेसर स्वैनले पनि कामको द्रुत प्रगति सुनिश्चित गर्न व्यक्तिगत रूपमा काम गर्ने र प्रक्रियालाई छिटो बनाउन भारत सरकारको शिक्षा मन्त्रालयसँग कुरा उठाउने आश्वासन दिए। उनले सिक्किम विश्वविद्यालयका बाँकी विभागहरूलाई यथाशिघ्र याङगाङ क्याम्पसमा स्थानान्तरण गर्न सुनिश्चित गर्ने प्रतिबद्धता व्यक्त गरे।
यस भ्रमणले सिक्किम विश्वविद्यालयलाई उच्च शिक्षाको एक प्रमुख केन्द्रमा रूपान्तरण गर्ने साझा दृष्टिकोणलाई पुन: पुष्टि गरेको बताइएको छ, जसले सिक्किम राज्यलाई अपार शैक्षिक र विकासात्मक लाभहरू प्रदान गर्नेछ।
हिन्दुस्थान समाचार / बिशाल
