मङ्गन, 26 अगस्त (हि.स.)। वन एवं पर्यावरण विभाग मन्त्री तथा जङ्गू निर्वाचन क्षेत्रका विधायक पिन्चो नामग्याल लेप्चाले आज अप्पर जङ्गूमा कनका नदीमाथि निर्मित 400 फिटको बेली सस्पेन्शन ब्रिजको उद्घाटन गरे। यस ब्रिजले लाभेन र लिङ्ग्जयालाई जोड्छ। यो नयॉं ब्रिजले मङ्गन जिल्लाको अप्पर जङ्गू अन्तर्गत लिङ्ग्ज्यादेखि तिङभोङ जीपीयू र साक्योङ पेन्टोङ जीपीयूलाई जोड्न महत्वपूर्ण सम्पर्क सुनिश्चित गर्नेछ।
यस अघि मन्त्री लेप्चाले अप्पर जङ्गूमा 255 मिटर लामो कायुम आर्च स्टील ब्रिज निर्माणको शुभारम्भको घोषणा गरेका थिए। अप्पर जङ्गूका सुदूर क्षेत्रहरूमा पहुॅंच सुनिश्चित गर्न जङ्गूका मानिसहरूले उक्त अधुरो ब्रिजको निर्माण कार्य पुन: शुरू गर्न माग गर्दै आएका थिए। उनले मुख्यमन्त्री प्रेमसिंह तामाङको नेतृत्वमा राज्य सरकारको हस्तक्षेपपछि पुलको निर्माण कार्य शुरू गर्न सम्भव भएको जानकारी गराए।
मन्त्री लेप्चाले जङ्गू निर्वाचन क्षेत्रका जनताले झेल्दै आएका बुनियादी चुनौतीहरूलाई सम्बोधित गर्दै क्षेत्रमा महत्वपूर्ण सम्पर्क परियोजनाहरूलाई अनुमोदन गरिदिएकोमा मुख्यमन्त्रीप्रति आभार प्रकट गरे। उनले यो ब्रिज मार्च 2027 सम्म पूरा हुने आशा व्यक्त गरे।
यस अतिरिक्त, उनले लोवर र अप्पर जङ्गूका सडकहरूमा अलकत्र बिछाउने कार्य अनुमोदन भएको र निर्धारित समयमा पूरा गरिने बताए। उनले क्षेत्रका जनताको हितलाई ध्यानमा राख्दै निर्माण कम्पनी र जन कार्य विभागका अधिकारीहरू र अभियन्ताहरूलाई समयमा निर्माण कार्य पूरा गरिदिन आह्वान पनि गरे।
हिन्दुस्थान समाचार / बिशाल
