कोलकाता, 27 अगस्त (हि. स.)। कृष्णनगरकी छात्रा ईशिता मल्लीको हत्या मामिलामा नयाँ खुलासा भएको छ। आरोपी देशराज सिंहले हत्या हुन एक दिनपूर्व आफ्नो पितालाई फोन गरेर भनेको थियो, उ उत्तर प्रदेश गइरहेको छ र ट्रेनको टिकट पनि कटाएको छ। बीएसएफमा कार्यरत पिताले पूर्वाञ्चल एक्सप्रेसको टिकट बुक गराएका थिए। देशराजले फोन गरेर आफू ट्रेनमा चढ़िसकेको पनि बताएको थियो। तर दोस्रो दिन उसले छात्राको घरभित्र पसेर नजिकबाटै गोली चलायो।

आरोपीका पिता रघुविन्दर प्रताप सिंह अहिलेघरि राजस्थानको जैसलमेरस्थित भारत-पाकिस्तान सीमामा तैनाथ छन्। उनले फोनमा स्पष्ट पारे, यदि छोरा दोषी छ भने उसले कड़ाभन्दा कड़ा सजाय पाउनुपर्छ। रघुविन्दरले बताए, गत 24 अगस्तको दिन छोराले फोन गरेर भनेको थियो कि उ ट्रेनमा चढ़िसकेको छ र नेटवर्कको समस्या छ। दोस्रो दिन उसको फोन बन्द आयो।

स्थानीय सूत्र अनुसार आरोपीको स्वभाव अत्यन्त रिसाहा किसिमको थियो। उसले आमा र बहिनीसित पनि कैयौंपटक झगड़ा गरेको सुनिएको थियो। छिमेकीहरू अनुसार देशराजले कसैसित बढ़ी मेलजोल राख्दैन थियो। रिसले गर्दा नै उसले आफ्नी सहपाठी इशिताको हत्या गरेको हुनसक्ने स्थानीयहरूको मान्यता छ।

देशराजकी आमा पुनम सिंहले पनि भनिन्, उनलाई घटनाबारे जानकारी थिएन। गत 24 अगस्तको ट्रेन मार्फत छोरा उत्तर प्रदेश आउने कुरा मात्र उनलाई थाहा छ।

घटनापूर्व आरोपीका आमा र बहिनी उत्तर प्रदेश गइसकेका थिए। पिता ड्यूटीमा थिए। घरमा एक्लै भएको देशराजले अचानक यस्तो भयानक घटनालाई परिणाम दियो।

हिन्दुस्थान समाचार / उष्णता छेत्री शर्मा