खरसाङ, 27 अगस्त (हि.स.)। दादी प्रकाशमणीजीको स्मृतिमा ब्रह्माकुमारीस् खरसाङद्वारा आयोजित मेगा रक्तदान शिविर अत्यन्तै सफल रहेको आयोजक समितिले बताएको छ। उक्त रक्तदान शिविरमा विशेषगरी 18-19 वर्षका नयाँ युवाहरूले उत्साहपूर्वक सहभागिता जनाएका थिए।
यस रक्तदान शिविरमा जम्मा 160 युनिट रगत संकलन गरिएको छ, जुन खरसाङको इतिहासमा पहिलो पटक रहेको दाबी गरिएको छ। यो ब्रह्माकुमारीस् संस्था र सम्पूर्ण खरसाङ क्षेत्रका लागि गर्वको विषय बनेको पनि बताइएको छ।
यसमा 37 युनिट रगत इण्डियन रेड क्रस सोसाइटी खरसाङले खरसाङ महकुमा अस्पतालको सह कार्यमा संकलन गरेको थियो भने 123 युनिट रगत लाइन्स क्लब खरसाङले महाराजा अग्रसर अस्पतालसॅंगको सहकार्यमा संकलन गरेको जानकारी प्राप्त भएको छ। कार्यक्रमको उद्घाटन खरसाङ नगरपालिका उपाध्यक्ष सुबाष प्रधान तथा ब्रह्माकुमारीज खरसाङकी सेन्टर–इन–चार्ज बीके दुर्गाले संयुक्त रूपमा गरेका थिए।
यस ऐतिहासिक रक्तदान शिविरमा खरसाङ नगरसँगै सोनादा, दिलाराम र नजिकका अन्य क्षेत्रहरूबाट पनि ठूलो संख्यामा मानिसहरूले सहभागिता जनाए र रक्तदान गरेर मानवताको सेवा गर्ने सन्देश दिएका थिए। यो सफल आयोजन समाजका विभिन्न वर्गहरूको सक्रिय सहभागिताबाट सम्भव भएको हो र यसले रक्तदानलाई महान दान (महादान) को रूपमा स्थापित गरेको जानकारी प्राप्त भएको छ।
हिन्दुस्थान समाचार / हनोक
