- कथित भिक्टिमाइजेशन र बालिका विरुद्ध बढ्दो हिंसाप्रति चिन्ता व्यक्त
गान्तोक, 27 अगस्त (हि.स.)। सिटिजन एक्सन पार्टी (सीएपी) सिक्किमको महिला परिषदले आज दक्षिण सिक्किम अन्तर्गत मल्लीडॉंड़ामा राज्यस्तरीय समन्वय बैठक आयोजन गऱ्यो। सीएपी अध्यक्ष गणेश कुमार राईको अध्यक्षतामा बसेको बैठकमा महिला परिषदकी उपाध्यक्ष एवं प्रभारी सुमति छेत्री, उपाध्यक्ष सञ्जु राई, उपाध्यक्ष तारा गुरुङ, महिला परिषद अध्यक्ष बिना शर्मा लगायत वरिष्ठ महिला नेतृत्वहरू उपस्थित थिए।
बैठकमा नेतृत्वहरूले पार्टीको दृष्टिकोणप्रति आफ्नो अटल प्रतिबद्धता दोहोर्याए तथा राजनीति र समाजमा महिलाको भूमिकालाई सुदृढ पार्ने प्रतिबद्धता जनाए। परिषद्ले सिक्किमभरि महिलाहरूको आवाजलाई वृद्धि गर्ने र उनीहरूको मर्यादा, अधिकार र आकांक्षाको रक्षा गर्न सामूहिक शक्तिको रूपमा काम गर्ने संकल्प गरेको प्रेस विज्ञप्तिमा उल्लेख छ।
बैठकमा महिला कर्मचारीहरूको कथित भिक्टिमाइजेशन र बालिका विरुद्ध बढ्दो हिंसाप्रति गम्भीर चिन्ता व्यक्त गरेको बताइएको छ। नेतृत्वहरूले यसलाई चिन्ताजनक र अत्यन्तै खेदजनक ठहर गर्दै सम्बन्धित आयोग र राज्य प्राधिकरणहरूको ध्यान आकर्षित गराएको छ।
महिला परिषदकी अध्यक्ष बिना शर्माले महिला परिषद् प्रत्येक महिलाको लागि सहयोगको स्तम्भको रूपमा मात्र उभिने छैन, तर प्रत्येक घरपरिवारमा सुधारको सन्देश पुर्याउने तथा सशक्तिकरण, न्याय र समानतामा लक्षित पार्टीको नीति र कार्यक्रमहरूको बारेमा जागरूकता फैलाउने बताइन्।
सीएपी अध्यक्ष राईले आफ्नो सम्बोधनमा महिला नेतृत्वहरूको साहस र समर्पणको सराहना गरे। उनले सीएपी समावेशी र न्यायपूर्ण समाज निर्माण गर्ने आफ्नो लक्ष्यमा अडिग रहेको दोहोर्याए, जहाँ महिलाहरू शासन र विकासमा समान साझेदार हुनेछन्।
हिन्दुस्थान समाचार / बिशाल
