गान्तोक, 27 अगस्त (हि.स.)। पश्चिम बंगालको सेवक, सिलगढ़ीबाट एक 14 वर्षीय बालकको कथित अपहरणको घटनाले सनसनी फैलिएको छ। बेपत्ता बनेका बालकको खोजीमा दार्जिलिङ पुलिस लागिपरेको छ।

गुरुङ एसोसिएशन अफ् सिक्किम (गुरास) ले 14 वर्षीय बालक इशान गुरुङ हराएको घटनाप्रति गहिरो चिन्ता व्यक्त गर्दै उनको शीघ्र र सुरक्षित प्राप्तिको कामना गरेको छ। गुरासले यस दुःखको समयमा पीडित परिवारप्रति पूर्ण समर्थन व्यक्त गर्दै खोजी प्रयासमा सबैलाई सहयोग गर्न अपील पनि गरेको छ।

गुरास अध्यक्ष पीएम गुरुङले इशान गुरुङको बारेमा जानकारी भएमा नजिकको पुलिस चौकीमा जानकारी गराउन वा गुरुङको परिवारलाई सम्पर्क गर्न अनुरोध गरेका छन्। उनले प्रशासनलाई यस विषयमा गम्भीरतापूर्वक अनुसन्धान गर्न र इशान गुरुङलाई छिटोभन्दा छिटो फेला पार्न आवश्यक सबै कदम चाल्न आग्रह गरेका छन्।

उनले बालक इशानलाई सुरक्षित रूपमा फिर्ता ल्याउन सबैको सहयोग महत्त्वपूर्ण रहेको विज्ञप्तिमा बताएका छन्।

हिन्दुस्थान समाचार / बिशाल