खरसाङ, 27 अगस्त (हि.स.)। तीनधारेमा तीन दिवसीय गणेश चतुर्थी एवं गणेश उत्सवको अवसरमा तीनधारेमा धार्मिक ऱ्यालीको आयोजना गरियो। तीनधारेको क्रिकेट बजारस्थित रामेश्वर शिवालय मन्दिर समितिको आयोजनामा तीन दिवसीय गणेश चतुर्थी साथै गणेश उत्सवको अवसरमा मन्दिर परिसरदेखि कलश यात्राको साथमा ऱ्याली निकालेर तीनधारे क्षेत्रमा परिक्रमा गरियो।
उक्त ऱ्यालीमा समाजसेवी अनुप गदाल अतिथिको रुपमा उपस्थित रहेका थिए भने रामेश्वर शिवालय मन्दिर समितिका सभापति बिमल गुरुङ र सचिव विनयकुमार छेत्री लगायत अन्यहरु उपस्थित रहेका थिए। रामेश्वर शिवालय मन्दिरमा साँझ 6 बजीदेखि बाल विकास केन्द्र तीनधारेद्वारा भजन कीर्तन गरियो भने राति स्थानीय कलाकारहरुले भजन कीर्तन प्रस्तुत गरे।
यसका साथै 28 अगस्त बिहिवार मानव उत्थान सेवा समिति तीनधारे शाखा र दार्जिलिङ महाकाल सेवा समितिको तर्फबाट भजन कीर्तन गरिने भएको छ। यसरी नै 29 अगस्तको दिन पूर्णावती कार्यक्रम हुनेछ भने स्थानीय गायकहरुलाई लिएर भजन कीर्तन गरिने छ। उक्त तीन दिवसीय गणेश चतुर्थी एवं गणेश उत्सव विश्व शान्ति र कल्याणका साथै सबैमा सुख-शान्ति बनिरहोस् भनी आयोजना गरिएको समितिका सचिव विनयकुमार छेत्रीले बताएका छन्।
हिन्दुस्थान समाचार / हनोक
