गान्तोक, 27 अगस्त (हि.स.)। सिक्किम अमेचुअर ताइक्वाण्डो एसोसिएशन (साटा) का मुख्य प्रशिक्षक त्रिलोक सुब्बाले ताइक्वाण्डोमा 8 दान हासिल गरेका छन्। उक्त उपलब्धी हासिल गर्ने उनी पूर्वोत्तर भारतका पहिलो र देशका दोस्रो खेलाड़ी हुन्।

उक्त जानकारी उनले आज राजधानीमा आयोजित एक पत्रकार सम्मेलनमा दिए। ताइक्वाण्डोको क्षेत्रमा 1981 देखि आफ्नो यात्रा शुरू गरेका त्रिलोक सुब्बाले यतिका वर्षको अथक परिश्रम र समर्पणपछि 8 दान हासिल गरेका छन्। यसका साथै उनले ताइक्वाण्डो ग्राण्ड मास्टरको उपाधि पनि प्राप्त गरेका छन्।

सुब्बाले अब 9 दानको लागि तयारी शुरू गरेको पनि जानकारी गराए। उनले 8 दान प्राप्त गर्नका लागि दक्षिण कोरियामा अनुसन्धान कार्य पूरा गरेर थेसिस बुझाएको जानकारी गराए। उनले आफ्नो यस कार्यको लागि मुख्यमन्त्री प्रेमसिंह तामाङ सहयोग गरेको बताउॅंदै मुख्यमन्त्रीप्रति आभार प्रकट गरेका छन्।

हिन्दुस्थान समाचार / बिशाल