खरसाङ, 28 अगस्त (हि.स.)। खरसाङमा डेमोक्रेटिक युथ फेडेरेशन अफ् इण्डिया (डीवाईएफआई) ले बिहिवार एक ऱ्याली निकाल्दै विभिन्न मागहरु लिएर खरसाङ खण्ड विकास अधिकारीलाई ज्ञापन पत्र बुझाएको छ।डीवाईएफआईले खरसाङको रेलवे स्टेशनबाट ऱ्याली निकालेर पंखाबारी रोड हुँदै खरसाङ खण्ड विकास कार्यालयसम्म पुगेर विभिन्न मागहरुमा ज्ञापन पत्र बुझाउने कार्य गऱ्यो।
ऱ्याली डीवाईएफआई दार्जिलिङ जिल्ला सचिव सागर शर्मा, खरसाङकी सचिव दिपा तामाङ, खरसाङका सदस्य-सदस्याहरु क्रमैले सुवासना खाती, सविन एक्का, निलिमा छेत्री लगायत अन्यहरु उपस्थित रहेका थिए। डीवाईएफआईले खरसाङ खण्ड विकास कार्यालयमा पुगेर संयुक्त खण्ड विकास अधिकारी फ्रान्को सिद्धार्थ तामाङलाई आठवटा विषयमा ज्ञापन पत्र बुझाउने कार्य सम्पन्न गऱ्यो। संगठनले सय दिने रोजागारको कार्य झट्टै शुरु गर्नुपर्ने, दैनिक हाजिरा 600 रुपियाँ गर्नुपर्ने, सय दिने रोजागारको कार्य वर्षमा 100 दिनबाट बढाएर 200 दिन गर्नुपर्ने आदि माग गरेको छ।
त्यसरी नै स्थानीय क्षेत्रमा रिक्त रहेको सरकारी कार्यालयहरुमा स्थानीय र योग्यहरुलाई झट्टै भर्नुपर्ने, रोहिणी क्षेत्रमा रहेको स्वास्थ्य केन्द्रको मरमत्ति गरेर जनसाधारणलाई असल स्वास्थ्य सेवा प्रदान गर्नुपर्ने, खरसाङ क्षेत्रका बन्द चियाबारीहरु झट्टै खोल्नु पर्ने, गुणस्तरीय शिक्षाको लागि सरकारले पहल गर्नुपर्ने र निजी स्कूलहरुमा मासिक शुल्क घटाउनु पर्ने माग गरिएको छ।
हिन्दुस्थान समाचार / हनोक
