खरसाङ, 28 अगस्त (हि.स.)। भारतीय गोर्खा प्रजातान्त्रिक मोर्चाको भातृ संगठन प्रजातान्त्रिक असंगठित श्रमिक संगठन खरसाङ महकुमा समितिले सन्त मेरिज 2 ग्राम पञ्चायत अन्तर्गत पुरानो पाठशाला सन्त मेरिज प्राथमिक पाठशाला भवन आफ्नै खर्चमा रंग लगाउने कार्य गरेको छ। उक्त पाठशाला भवनको अवस्था धेरै साेचनीय बनेको थियो। पाठशालाको नाम समेत मेटिएको थियो।
युवाहरूले यहाँ स्कूल छ भन्ने कल्पनासम्म गर्नु सकेका थिएनन्। यस्तो अवस्था देखेर प्रजातान्त्रिक असंगठित श्रमिक संगठन खरसाङ महकुमा अध्यक्ष एलजिन ब्राह्मणको विशेष पहलमा स्कूलभित्र अनि बाहिर रंग लगाउने कार्य गरिएको छ। युवाहरूले स्कूलको नाम पनि लेखिदिएका छन्।
यस पहलमा संगठनका उप सभापति प्रवकर रोका, सह सचिव जीवन माेहरा, विकास सार्कीले पनि श्रमदान गरी सहयाेग पुऱ्याएका थिए। संगठनकाे यस्तो पहलप्रति स्कूल पक्षले प्रसंशा गर्दै यसरी नै सेवा गर्ने कार्यमा निरन्तर अघि बढिरहन प्रोत्साहन प्रदान गरेका छन्।
अध्यक्ष एल्जिन ब्राह्मणले भने, अध्यक्ष अनित थापाले हामीलाई 'कर्म गर फलकाे आशा नगर, कर्म नै हाम्रो सिद्धान्त' भनेर सिकाएका छन्। आगामी दिनहरूमा पनि संगठनले यस्तो कार्य लगातार रुपमा गरिरहने छ। उनले हाम्रो क्षेत्रमा भएका सरकारी पाठशालाहरुमा नानीहरूलाई पठाउनुपर्छ भन्दै सरकारले उपलब्ध गराएका सुविधाहरूबाट लाभ उठाउनु पर्छ भनी बताए।
हिन्दुस्थान समाचार / हनोक
