जयपुर, 29 अगस्त (हि.स.)। मुख्यमन्त्री भजनलाल शर्माले भनेका छन्, बिहारमा कंग्रेस-आरजेडीले निर्लज्जताका सबै सीमा नाघिसकेको छ। उनले भने, राहुल गान्धी र तेजस्वी यादवद्वारा मञ्चबाटै भारत माताका प्यारो सपुत यशस्वी प्रधानमन्त्री नरेन्द्र मोदीकी दिवंगत आमामाथि गरिएको अभद्र टिप्पणी घोर निन्दनीय छ। यस कृत्यको लागि कंग्रेस-आरजेडीलाई देशले कहिल्ये माफ गर्नेछैन।
शर्माले गए बिहीवार राति भीडियो सन्देशको माध्यमबाट भने, आमा जानकीको पावन धरती, ज्ञानको भूमि औ तपोस्थली बिहारमा प्रधानमन्त्रीकी स्वर्गीय माताजीको अपमानले यी पार्टीहरूको चरित्र र संस्कारलाई स्पष्ट पार्दछ। राहुल गान्धी तथा तेजस्वी यादव सहित इण्डी ठगबन्धनका नेताहरूले यो कुरा पचाउन सकिरहेका छैनन् कि एकजना गरीब आमाका छोरा देशका प्रधानमन्त्रीको पदमा कसरी आसिन भए र कसरी देशका जनताले उनलाई आफ्नो मनमा राखेका छन्। जुन आमाले संघर्ष गरेर तथा परिश्रमको पराकाष्ठ नाघेर गरिमापूर्ण जीवन व्यतित गरिन् ती पुण्यात्माको देवलोकगमनपछि उनलाई यसरी कंग्रेस अनि आरजेडीले सार्वजनिक मञ्चबाट अपमान गर्नु भारतको महान परम्परामा कतै पनि स्वीकार्य छैन।
मुख्यमन्त्रीले भने, एकातिर प्रधानमन्त्री नरेन्द्र मोदीले मातृ शक्ति वन्दना जस्तो ऐतिहासिक कानून बनाइरहेका छन् भने अर्कोतिर दुई राजकुमारहरूले महिलाहरूप्रति आफ्नो निकृष्ट मानसिकता दर्शाइरहेका छन्। यो भारतको मातृशक्तिको घोर अपमान हो। उनले भने, चुनाउ हार्न लाग्दा यसरी अपशब्दहरू प्रयोग गर्ने कंग्रेसको परम्परा नै रहिआएको छ। उनीहरू आफै पनि भ्रष्ट छन् र मति पनि भ्रष्ट भएको छ। बिहारका मानिसहरूले भोटको लागि इण्डी गठबन्धन यतिसम्म तल खस्नसक्छ भन्ने कुरा बुझिसकेका छन्।
हिन्दुस्थान समाचार / उष्णता छेत्री शर्मा