खरसाङ, 29 अगस्त (हि.स.)। खरसाङ क्षेत्रका समाजसेवी, शिक्षक एवं विभिन्न संघ संस्थाहरुमा संलग्न रहेर सक्रिय रुपमा कार्य गर्दै आएका दुर्गासिंह छेत्रीको निधन भएको छ। उनको निधन बिहिवार राति 10 बजीतिर 78 वर्षको उमेरमा दिल्लीमा भएको छ।
उनी विगत केही समयदेखि दिल्लीमा छोरा बुहारीसित बस्दै आएका थिए। उनले आफुपछि छोरा-बुहारी, नातिनी, भाइहरु छोडिगएका छन्। उनको अन्तिम संस्कार शुक्रवार दिउँसो दिल्लीमा नै गरिएको पारिवारिक स्रोतबाट जानकारी प्राप्त भएको छ।
दुर्गा सिंह छेत्रीको जन्म 22 अगस्त, 1947 सालमा भएको थियो। उनी खरसाङको डेभिस प्राथमिक पाठशालामा पढेर सोही स्कूलमा 1964 सालदेखि शिक्षकको रूपमा कार्य शुरु गरेका थिए। उनी सोही प्राथमिक पाठशालामा प्रधान अध्यापकको रुपमा कार्य गरेर 2007 सालमा अवकाशप्राप्त भएका थिए।
उनले दागोपापबाट लाइफ टाइम्स एचिभमेन्ट अवार्ड प्राप्त गरेका थिए भने जिल्ला पाठशाला परिषदको सदस्य पनि रहेका थिए। 1986 सालको गोर्खाल्याण्ड आन्दोलनमा उनले सक्रिय भूमिका निर्वाह गरेका थिए भने जेलसम्म पनि परेका थिए।
उनको निधनमा खरसाङ महकुमा खेलकूद संघले शोक सभा आयोजना गरेको छ। स्व. छेत्री संघको कोषाध्यक्ष थिए। संघका सभापति मोहन योञ्जनको अध्यक्षतामा सम्पन्न शोक सभामा दिवंगत आत्माको चिर शान्तिको लागि प्रार्थना गरिएको जानकारी प्राप्त भएको छ।
हिन्दुस्थान समाचार / हनोक
