खरसाङ, 29 अगस्त (हि.स.)। खरसाङ महकुमा अस्पतालकी अधीक्षक डाक्टर रूबी मण्डलको खरसाङ अस्पतालबाट पदोन्नति भएर सरुवा भएको छ। यसै क्रममा आज उनलाई सम्मान एवम् विदाई जनाउन अस्पतालका कर्मचारीहरूले यहाँको एउटा होटलमा विशेष कार्यक्रमको आयोजना गऱ्यो।

कार्यक्रममा अस्पतालका कर्मचारीहरूले डा. मण्डललाई खदा लगाएर, उपहारहरू अनि सम्मानपत्र प्रदान गरेर सम्मान जनाए। बिरेन छेत्रीले पहाड़मा प्रायः दुई दशकभन्दा धेर रहेर यहाँका मानिसहरूलाई सेवा प्रदान गरेकोमा डा. मण्डलप्रति कृतज्ञता व्यक्त गरे। यसैगरी, विजय सिञ्चुरीले डा. मण्डलद्वारा गरिएको कार्यको प्रशंसा गर्दै उनीजस्तो एक कुशल अधिकारी पाउनु गर्वको कुरा रहेको बताए।

डाक्टर मण्डलले आजभन्दा प्रायः 20 वर्षअघि दार्जिलिङ पहाड़ आएको र सुके अस्पतालमा एक जिम्मेवारी पद सम्हाल्नु परेको बताइन्। त्यस समय धेरै असुविधा भए तापनि त्यहाँका सबै स्टाफहरूको सहयोग पाएको र खरसाङ अस्पतालमा आएपछि यहाँ पनि सबैको सहयोग र समर्थन पाएको जनाइन्। उनले यत्तिका वर्षसम्म पहाड़मा बसेको हुँदा यहाँ धेरै आत्मियता प्राप्त भएको बताइन्।

तिनले पहाड़वासीको माया र श्रद्धालाई आफ्नो जीवनमा कहिल्यै नभुल्ने बताउँदै यो सम्मान र मायाको निम्ति सबैलाई धन्यवाद दिइन्। डाक्टर मण्डलले आफूलाई यस अधिकारीको पदमा आसीन गराउन डाक्टर पूरण शर्माको ठूलो हात र सहयोग रहेको अवगत गराउँदै उनकै प्रेरणा, सहयोग र हिम्मतले सुके अस्पतालदेखि खरसाङ अस्पतालसम्म एक अधिकारीको रुपमा आफूलाई उभ्याउन सफल भएको बताइन्।

हिन्दुस्थान समाचार / हनोक