पाकिम, 29 अगस्त (हि.स.)। हक्कीका दिग्गज मेजर ध्यान चन्दको जयन्तीको उपलक्ष्यमा आज बिहान नाम्चेबुङमा पाकिम जिल्लास्तरीय राष्ट्रिय खेल दिवस 2025 पालन गरियो। राष्ट्रिय खेल दिवसको यस वर्षको थीम 'शान्तिपूर्ण समाज र समावेशी समाजलाई प्रवर्द्धन गर्न खेलकुद' रहेको छ।
कार्यक्रममा पाकिम जिल्ला अध्यक्ष लाडेन ल्हमु भोटिया मुख्य अतिथि थिइन्। मुख्य अतिथिले केटा र केटी वर्गको मुख्यमन्त्री वान माइल रनलाई झण्डा हल्लाएर कार्यक्रमको शुरुवात गरिन्। उनले उपस्थित सबैलाई फिट इण्डिया शपथ पनि दिलाइन्। यस अवसरमा विद्यार्थीहरूलाई संलग्न गर्न प्रश्नोत्तर प्रतियोगिता पनि आयोजना गरिएको थियो।
मुख्य अतिथि भोटियाले आफ्नो सम्बोधनमा विद्यार्थीहरूलाई आफ्नो लक्ष्य दृढ़ताका साथ पछ्याउन प्रोत्साहित गरिन्। उनले फिटनेश कायम राख्न, मादक पदार्थहरूबाट टाडा रहन र आफ्ना अभिभावकहरूका सपनालाई पूरा गर्ने प्रयास गर्न आह्वान गरिन्।
यसैगरी, खेलकुद एवं युवा मामिला विभागका उपनिदेशक निम दोर्जी भोटियाले विभिन्न पहलहरूद्वारा खेलकुदको क्षेत्रलाई समर्थन प्रोत्साहन प्रदान गरेकोमा मुख्यमन्त्रीप्रति कृतज्ञता व्यक्त गरे। उनले राष्ट्रिय खेल दिवस पालन गर्नुको महत्वबारे जानकारी गराउॅंदै मेजर ध्यान चन्दको जीवनमाथि प्रकाश पारेका थिए। उनले विद्यार्थीहरूलाई आफ्नो खेल कौशल बढाउन, फिटनेश कायम राख्न सुझाउ दिए।
कार्यक्रममा पिकलबल एसोसिएशन अफ् सिक्किमका पूर्व महासचिव हेमन्त गुरुङ र खेलो इण्डिया प्रशिक्षक चन्द्रकला शर्मालाई खेलकुदको क्षेत्रमा उनको योगदानको कदर गर्दै सम्मानित गरियो। यसैगरी, खेलकुद प्रतियोगिताका विजेता र उपविजेताहरूलाई पुरस्कार र उपहारहरू प्रदान गरिएको थियो।
हिन्दुस्थान समाचार / बिशाल
