गान्तोक, 29 अगस्त (हि.स.)। राष्ट्रिय बाल अधिकार संरक्षण आयोग (एनसीपीसीआर) ले त्रिपुरा सरकारको समाजिक कल्याण तथा सामाजिक शिक्षा विभागसँगको सहकार्यमा 29 अगस्त, 2025 का दिन अगरतलाको प्रज्ञा भवनमा बाल अधिकार सम्बन्धी एक दिवसीय पूर्वोत्तर क्षेत्रीय सम्मेलनको आयोजना गर्‍यो। सम्मेलनमा सिक्किमबाट सिक्किम राज्य बाल अधिकार संरक्षण आयोगका सदस्य अनिश शर्मा र महिला, बालबालिका, ज्येष्ठ नागरिक तथा दिव्याङ्गजन कल्याण विभागकी संयुक्त सचिव मनीषा सिन्चुरी तथा अन्य अधिकारीहरू सहभागी बनेको आयोगले विज्ञप्तिमा बताएको छ।

सम्मेलनमा त्रिपुराका मुख्यमन्त्री माणिक साहा प्रमुख अतिथि र त्रिपुराको समाजिक कल्याण तथा सामाजिक शिक्षा मन्त्री टिंकु राय विशिष्ट अतिथि थिए। सम्मेलनलाई एनसीपीसीआरकी अध्यक्ष तृप्ति गुर्हाले सम्बोधन गरेकी थिइन्। सम्मेलनमा सबै पूर्वोत्तर राज्यहरूका एससीपीसीआरका अध्यक्षहरू र सदस्यहरू, पुलिस, महिला तथा बाल, शिक्षा, श्रम, स्वास्थ्य लगायतका लाइन विभागका वरिष्ठ सरकारी अधिकारीहरू तथा बाल अधिकार र संरक्षणको क्षेत्रमा काम गर्ने सरोकारवालाहरूको सहभागिता थियो।

कार्यक्रममा एससीपीसीआरका सदस्य अनिश शर्माले बाल अधिकारको सिंहावलोकन सम्बन्धी सत्रमा प्यानलिस्टको रूपमा किशोर न्याय अधिनियम, 2015 मा आफ्नो अन्तर्दृष्टि पेश गर्दै सिक्किममा बाल अधिकार ढाँचाको कार्यान्वयन र सामना गरिरहेका चुनौतीहरूको बारेमा जानकारी साझा गरे।

त्यसैगरी, महिला तथा बाल विभागकी संयुक्त सचिव मनीषा सिन्चुरी 'एनसीपीसीआरको स्कूल सुरक्षा निर्देशिकाको सन्दर्भमा स्कूलमा बालबालिकाको सुरक्षा' विषयक सत्रमा प्यानलिस्ट थिइन्। उनले सिक्किम सरकार र एससीपीसीआर साथै महिला तथा बाल विकास विभागले स्कूल सुरक्षा संयन्त्रलाई सुदृढ पार्न र बालबालिकाको लागि सुरक्षित वातावरण सुनिश्चित गर्न गरेका पहलहरूमाथि प्रकाश पारिन्।

हिन्दुस्थान समाचार / बिशाल