गान्तोक, 12 सेप्टेम्बर (हि.स.)। भारतीय रिजर्भ ब्याङ्क, गान्तोकले 11 सेप्टेम्बर, 2025 मा पाकिम जिल्लाको लिङ्ताम फदमचेन जीपीयूमा वित्तीय समावेशीकरण योजनाहरूको लागि क्षेत्रीय वित्तीय साक्षरता कार्यक्रम र मेगा सन्तृप्ति शिविर आयोजना गर्‍यो। कार्यक्रममा आरबीआई गान्तोकका महाप्रबन्धक गोदा रविशङ्कर, सिक्किम सरकारको वित्त विभागका निर्देशक महेन्द्र प्रधान, सिस्को ब्याङ्कका प्रबन्ध निर्देशक (एमडी) लगायत आरबीआई र सहभागी ब्याङ्कका अन्य अधिकारीहरूको उपस्थिति थियो। यो कार्यक्रममा लगभग 100-120 व्यक्तिहरूको सहभागिता रहेको थियो। उक्त जानकारी आज पीआईबीले दिएको छ।

यो कार्यक्रम गोदा रविशङ्करको स्वागत भाषणबाट शुरु भयो, जसले शिविरका उद्देश्यहरू रेखाङ्कित गरे तथा विशेष गरी ग्रामीण क्षेत्रहरूमा सतत आर्थिक विकासलाई बढ़ावा दिनका लागि वित्तीय साक्षरता, बजेट र बचतको महत्त्वमाथि प्रकाश पारे।

आरबीआई गान्तोकका प्रबन्धक सोहन सिंह राजपुरोहितले ग्राहक सेवा र शिकायत निवारण संयन्त्रको बारेमा विस्तृत सत्र प्रस्तुत गरे। आरबीआई गान्तोकका प्रबन्धक पराज नागदिवेले ब्याङ्कहरूमा साइबर धोकाधड़ीको बढ्दो खतराको बारेमा जानकारी दिए तथा सहभागीहरूलाई डिजिटल कारोबारका लागि सुरक्षित अभ्यासहरूको बारेमा शिक्षित गरे। सिस्को ब्याङ्कका प्रबन्ध निर्देशकले स्वयं सहायता समूहहरूको लागि ऋणको उपलब्धता र लाभहरूको बारेमा चर्चा गरे। एसबीआईका एजीएम गोपाल लामाले ऋण प्रशोधनका महत्त्वपूर्ण पक्षहरूको बारेमा विस्तृत जानकारी प्रदान गरे।

सिक्किम सरकारको वित्त विभागका निर्देशक महेन्द्र प्रधानले सहभागीहरूलाई प्रधानमन्त्री जीवन ज्योति बीमा योजना, प्रधानमन्त्री सुरक्षा बीमा योजना र अटल पेन्शन योजना जस्ता सामाजिक सुरक्षा योजनाहरूको महत्त्वको बारेमा सम्बोधन गरे। उनले यी योजनाहरूले कम आय भएका परिवारहरूलाई कसरी महत्त्वपूर्ण सुरक्षा जाल प्रदान गर्दछन् भन्ने कुरामा जोड दिए तथा सहभागीहरूलाई दीर्घकालीन वित्तीय सुरक्षाको लागि आफूलाई नामाङ्कन गर्न आग्रह गरे। जागरूकता अभियानलाई अझ आकर्षक र सान्दर्भिक बनाउन, साइबर धोकाधड़ीको विषयमा नुक्कड नाटक मञ्चन गरिएको थियो, जसले सुरक्षित ब्याङ्किङ अभ्यासहरूमा मुख्य सन्देश सरल र प्रभावकारी तरिकाले पुर्‍यायो।

शिविरले सामाजिक सुरक्षा योजनाहरू अन्तर्गत सहभागीहरूको स्थलगत नामाभ्कन र उनीहरूको ब्याङ्क खाताको पुन: केवाईसीलाई पनि सहज बनायो, जसले लाभार्थीहरूले वित्तीय समावेशीकरण पहलहरू अन्तर्गत प्रदान गरिएका सेवा र सुरक्षा उपायहरूको पूर्ण दायरा पहुँच गर्न सकुन् भन्ने कुरा सुनिश्चित गर्‍यो।

हिन्दुस्थान समाचार / बिशाल