मङ्गन, 02 सेप्टेम्बर (हि.स.)। उत्तर सिक्किमको टुङ नागामा हिमनदी ताल फुटेर आएको बाढी (जीएलओएफ) बाट प्रभावित नागरिकहरूको पुनर्वाससँग सम्बन्धित भूमि सीमाङ्कनको लागि अन्तिम संयुक्त सर्वेक्षण आज सफलतापूर्वक सम्पन्न गरियो। सर्वेक्षण टोलीले प्रस्तावित पुनर्वास स्थलको सम्पूर्ण सीमा पहिचान गऱ्यो, जसले गर्दा सबै सरोकारवालाहरूबीच स्पष्टता र सहमति सुनिश्चित भएको बताइएको छ।
सर्वेक्षण अवधि सिक्किम कल्याण आयोगका अध्यक्ष निम छिरिङ लेप्चा, मङ्गनका एडीसी डा. सोनाम आर. लेप्चा, एसडीएम सन्दीप कुमार, टुङ नागा वार्डका पञ्चायत सभापति सोनाम छिरिङ लेप्चा, जिल्ला पञ्चायत सदस्य डिकी ल्हमु लेप्चा, सम्बन्धित जमिन मालिकहरू आदि उपस्थित थिए।
यस अवसरमा केही विचाराधीन भूमि सम्बन्धी मुद्दाहरू घटनास्थलमै सौहार्दपूर्ण रूपमा समाधान गरिएको बताइएको छ। टोलीले मानव बसोबासको लागि प्रस्तावित भूमिको स्थिरता र उपयुक्तताको बारेमा पनि विस्तृत छलफल गर्यो। अध्यक्ष लगायत पञ्चायत प्रतिनिधिहरू र लाइन विभागका अधिकारीहरूले नयाँ बस्तीको दीर्घकालीन सुरक्षा र लचिलोपन सुनिश्चित गर्न भौगोलिक र पर्यावरणीय अवस्थाहरूको समीक्षा गऱ्यो।
अध्यक्ष लेप्चाले आगामी गाउँको दिगो विकासको लागि र पुनर्स्थापित नागरिकहरूको लागि जीविकोपार्जनका अवसरहरू र आवश्यक सेवाहरूमा पहुँच सुनिश्चित गर्न भरपर्दो र सुनियोजित सम्पर्क महत्त्वपूर्ण रहेको कुरामा जोड दिए।
सिक्किम सरकारले टुङ नागाका जीएलओएफ प्रभावित परिवारहरूको पुनर्वास र पुनर्स्थापनलाई उच्च प्राथमिकता दिएको बताइएको छ। सिक्किम सरकारको ग्रामीण विकास विभागद्वारा भूमि सर्वेक्षण र विकास योजनाहरू पेश गरेपछि कार्य योजना सहितको विस्तृत प्रतिवेदन उच्च अधिकारीलाई बुझाइने जानकारी मङ्गन जिल्ला प्रशासनले दिएको छ।
हिन्दुस्थान समाचार / बिशाल
