नयाँ दिल्ली, ३० सेप्टेम्बर (हि.स.)। भारतीय जनता पार्टी (भाजपा) का वरिष्ठ नेता विजय कुमार मल्होत्राको ९४ वर्षको उमेरमा आज बिहान करिब ६ बजे निधन भएको छ। उनको पार्थिव शरीर दिल्लीस्थित आधिकारिक आवास २१, गुरुद्वारा रकाबगञ्ज रोडमा अन्तिम दर्शनका लागि राखिएको छ। मल्होत्रा केही दिनदेखि अखिल भारतीय आयुर्विज्ञान संस्थान (एम्स) मा उपचाररत थिए। उनको निधनले राजनीतिक वृत्तमा शोक छाएको छ। प्रो. मल्होत्राले पूर्व प्रधानमन्त्री अटल बिहारी वाजपेयी र लालकृष्ण आडवाणीसँगै जनसंघमार्फत राजनीति प्रवेश गरेका थिए।

प्रधानमन्त्री मोदीले दिए श्रद्धाञ्जली

प्रधानमन्त्री नरेन्द्र मोदीले मल्होत्राको निधनमा शोक व्यक्त गरेका छन्। उनले एक्समा लेखेका छन्– “श्री विजय कुमार मल्होत्रा जी उत्कृष्ट नेता हुनुहुन्थ्यो, जसलाई जन सरोकारका विषयमा गहिरो ज्ञान थियो। दिल्लीमा पार्टीलाई मजबुत बनाउन उहाँले महत्वपूर्ण भूमिका खेल्नुभयो। उहाँका संसदीय योगदानलाई सदैव स्मरण गरिनेछ। उहाँको निधनले दुःखी छु। परिवारजन र समर्थकप्रति समवेदना। ॐ शान्ति।”

अमित शाह व्यथित

गृह तथा सहकारितामन्त्री अमित शाहले पनि गहिरो शोक व्यक्त गर्दै भने, “जनसंघदेखि जनता पार्टी र भाजपा सम्म संगठनलाई आकार र विस्तार दिनुहुने वरिष्ठ नेता विजय कुमार मल्होत्राको निधनले मन अत्यन्त पीडित भएको छ। दिल्ली भाजपा अध्यक्ष, दिल्ली विधानसभा विपक्षी दलका नेता वा जनप्रतिनिधि— प्रत्येक भूमिकामा उहाँले देश र दिल्लीवासीको सेवा गर्नुभयो। उहाँसँगको प्रत्येक भेटमा संगठन सम्बन्धी महत्वपूर्ण कुरा सिक्न पाइन्थ्यो। यस शोकको घडीमा सारा भाजपा परिवार उहाँका परिवारसँगै छ। ईश्वरले दिवंगत आत्मालाई श्रीचरणमा स्थान दिऊन्। ॐ शान्ति शान्ति शान्ति।”

वीरेन्द्र सचदेवाले भने— हाम्रा प्रेरणास्रोत हुन्

भाजपा दिल्ली प्रदेश अध्यक्ष वीरेन्द्र सचदेवाले भने, “हामी अत्यन्तै दुःखका साथ सूचित गर्दछौं कि भाजपा वरिष्ठ नेता र दिल्ली भाजपा का पहिलो अध्यक्ष प्रो. विजय कुमार मल्होत्राको आज बिहान निधन भएको छ।” उनले थपे, “उहाँको जीवन सादगी र जनसेवाको उदाहरण थियो। जनसंघको दिनदेखि नै उहाँले दिल्लीमा विचारधाराको विस्तारका लागि अथक प्रयास गर्नुभयो। उहाँको जीवन सधैं भाजपा कार्यकर्ताका लागि प्रेरणाको स्रोत रह्यो र रहिरहनेछ।”

लाहौरमा जन्म

भाजपा वेबसाइट अनुसार, विजय कुमार मल्होत्राको जन्म ३ दिसम्बर, १९३१ मा ब्रिटिश भारतको लाहौरमा भएको थियो, जुन अहिले पाकिस्तानमा पर्दछ। उनी कविराज खजान चन्दका सात सन्तानमध्ये चौथो सन्तान थिए। मल्होत्रालाई भारतीय राजनीतिज्ञ र खेल प्रशासकका रूपमा सम्झिन्छ। उनी दिल्ली प्रदेश जनसंघका अध्यक्ष (१९७२–७५) र दुई कार्यकालसम्म भाजपा दिल्ली प्रदेश अध्यक्ष (१९७७–८०, १९८०–८४) रहे।

मनमोहन सिंहमाथि विजय— जीवनको ठूलो सफलता

मल्होत्राको राजनीतिक जीवन लामो र सक्रिय रह्यो। केदारनाथ साहनी र मदनलाल खुरानासँग मिलेर उनले दिल्लीमा भाजपा कायम राख्न ठूलो योगदान दिए। सन् १९९९ को आम निर्वाचनमा पूर्व प्रधानमन्त्री डा. मनमोहन सिंहलाई भारी मतान्तरले पराजित गर्नु उनको सबैभन्दा ठूलो राजनीतिक उपलब्धि मानिन्छ। उनी पछिल्लो ४५ वर्षमा दिल्लीबाट पाँच पटक सांसद र दुई पटक विधायक बने। सन् २००४ को आम निर्वाचनमा दिल्लीमा आफ्नो सीट जित्ने एकमात्र भाजपा उम्मेदवार पनि उनी नै थिए। मल्होत्राले हिन्दी साहित्यमा डक्टरेट उपाधि हासिल गरेका थिए। राजनीति र सामाजिक कार्यबाहेक उनले शतरञ्ज र तीरअन्दाजी संघहरूको प्रशासनमा पनि निर्णायक भूमिका खेलेका थिए।

---------------

हिन्दुस्थान समाचार / बिशाल