नयाँ दिल्ली, ३० सेप्टेम्बर (हि.स.)। भारतका प्रधानमन्त्री नरेन्द्र मोदीले आज बिहान शारदीय नवरात्रिको महाअष्टमीको अवसरमा सबैको जीवनमा सुख र शान्तिको कामना गरेका छन्। उनले आफ्नो एक्स ह्यान्डलमा लेखेका छन्, ‘‘सबै देशवासीलाई नवरात्रि महाअष्टमीको धेरै शुभकामना। मेरो कामना छ, यो पावन अवसरले सबैको जीवनमा सुख, शान्ति र उत्तम स्वास्थ्य ल्याओस्।’’

प्रधानमन्त्री मोदीले शक्ति उपासनाको यस महान पर्वमा शारदीय नवरात्रिको सुरुदेखि नै देवीका प्रत्येक स्वरूपका अवसरमा देशवासीका लागि प्रार्थना गर्दै आएका छन्। उनले देवी माताका चरणमा नमन गर्दै सबैका दुःख हटाइदिन र सबैको कल्याण होस् भन्ने प्रार्थना गरेका छन्। साथै उनले देवी माताले सबैलाई अदम्य साहसको आशीर्वाद दिन र आत्मबलको संचार गरून् भन्ने कामना पनि गरेका छन्।

शारदीय नवरात्रिलाई नराम्रोमाथि राम्रोको विजयको प्रतीक मानिन्छ। धार्मिक विश्वासअनुसार यो पर्व देवी दुर्गाले राक्षस महिषासुरसँग नौ दिनसम्म युद्ध गरेर विजय हासिल गरेको प्रतीक हो। दशौं दिन (विजयादशमी वा दशैं) महिषासुर वधको उत्सव मनाइन्छ। यी नौ दिनमा दुर्गा माताका नौ फरक–फरक स्वरूपको पूजा गरिन्छ। प्रत्येक दिन एक विशेष देवीलाई समर्पित हुन्छ।

यो पर्वलाई शरद ऋतु आगमनको प्रतीकका रूपमा पनि मानिन्छ। भक्तहरूले यस अवधिमा उपवास, प्रार्थना र अनुष्ठानमार्फत आध्यात्मिक नवीनीकरण गर्छन्। गुजरातमा यस पर्वमा परम्परागत लोकनृत्य जस्तै डान्डिया र गर्बा भव्य रूपमा आयोजना हुन्छन्। पश्चिम बंगालमा भव्य पण्डाल सजाइन्छ। उत्तर भारतमा रामलीला मञ्चन हुन्छ भने दशहरा दिन रावणका पुतला दहन गरिन्छ।

---------------

हिन्दुस्थान समाचार / भवानी थामी