पूर्वी सिंहभूम, १० जनवरी (हि.स.)। झारखण्डको पूर्वी सिंहभूम जिल्लाअन्तर्गत मुसाबनी थाना क्षेत्रको सुरदामा शुक्रबार राति भएको एक भीषण सड़क दुर्घटनामा तीन युवकको घटनास्थलमै मृत्यु भएको छ भने एक युवक गम्भीर रूपमा घाइते भएका छन्। दुर्घटना सुरदास्थित युनियन ब्याङ्क नजिक त्यस समयमा भएको हो, जब एउटै स्कुटरमा सवार चार युवक सड़क छेउमा बिग्रिएर रोकिएको हाइवामा ठोक्किएका थिए। दुर्घटना यति भयावह थियो कि स्कुटरसहित सबै युवक हाइवाको मुनि पसेका थिए।
प्राप्त जानकारीअनुसार, घाटशिला थाना क्षेत्रको जगन्नाथपुर निवासी राहुल कर्मकार आफ्ना दुई भाई रोहित कर्मकार र समीर कर्मकार तथा भान्जा राज गोपसँग दिनको समयमा सुरदामा ससुराली गएका थिए। शुक्रबार राति चारै जना एउटै स्कुटरमा सवार भई सुरदाबाट आफ्नो घर जगन्नाथपुर फर्किरहेका थिए। सोही क्रममा अँध्यारोका कारण सुरदा युनियन ब्याङ्क नजिक सड़क छेउमा पहिले नै रोकिएको हाइवासँग ठोक्किियो।
दुर्घटनामा रोहित कर्मकार (२१), समीर कर्मकार (१८) र राज गोप (१७) को घटनास्थलमै मृत्यु भयो। राहुल कर्मकार (२६) गम्भीर रूपमा घाइते भए। स्थानीयवासीहरूको सहयोगमा घाइते राहुललाई तत्काल घाटशिला अनुमण्डल अस्पताल पुर्याइयो, जहाँ प्राथमिक उपचारपछि उनको अवस्था गम्भीर देखिएकाले जमशेदपुरस्थित एमजीएम अस्पतालमा रिफर गरिएको छ।
घटनाको जानकारी पाउनासाथ घाटशिला र मुसाबनी थाना क्षेत्रका पुलिस टोली घाटशिला अनुमण्डल अस्पताल पुगे र घटनासम्बन्धी विवरण संकलन गरे। दुर्घटनाको खबर फैलिएसँगै जगन्नाथपुर तथा छेउछाउका गाउँहरूबाट ठूलो संख्यामा स्थानीय बासिन्दा अस्पताल पुगेका थिए। जानकारीअनुसार, रोहित र राहुल दुवै विवाहित थिए र घाटशिला क्षेत्रमा पुट्टी (निर्माणसम्बन्धी) काम गरेर परिवारको जीविकोपार्जन गर्दै आएका थिए। पुलिसले तीनै जनाको शव पोस्टमार्टमका लागि पठाइसकेको छ र दुर्घटनाका कारणबारे जांच जारी रहेको छ। यस घटनाले सम्पूर्ण क्षेत्रमा शोकको लहर फैलिएको छ।
---------------
हिन्दुस्थान समाचार / भवानी थामी
