इम्फाल, १४ अक्टोबर (हि.स.)। मणिपुरमा पुलिस तथा सुरक्षा बलको अभियान निरन्तर जारी छ। अभियानका क्रममा उग्रवादी सङ्गठनका सदस्यहरू पक्राउ पर्नुका साथै अन्य प्रकारका अपराधीहरूलाई पनि पक्राउ गर्ने कार्य तीव्र पारिएको छ।

मणिपुर पुलिस मुख्यालयले बुधबार बिहान जारी गरेको विज्ञप्तिअनुसार, मङ्गलबार बिष्णुपुर जिल्लाको सीडीओको संयुक्त टोलीले क्वाक्ता सेवला गाउँ पञ्चायतको वार्ड नम्बर १ निवासी मोहम्मद अब्दुल हकिम (६०) लाई पक्राउ गरेको छ। आरोपी उग्रवादी सङ्गठन केसीपी (वाङलेन समूह) का सक्रिय सदस्य हुन्। उनलाई आफ्नै क्षेत्रबाट पक्राउ गरिएको हो। उनी क्वाक्ता क्षेत्रमा जबर्जस्ती रकम असुली गर्ने गतिविधिमा संलग्न थिए।

सोही दिन, गोप्य सूचनाका आधारमा इम्फाल पूर्वको विशेष कारबाही टोलीले इम्फाल पश्चिम जिल्लाको सिङजामेई थाना क्षेत्रअन्तर्गत सिङजामेई ओक्रम लीकाईमा गोप्य कारबाही चलाएको थियो। उक्त कारबाहीका क्रममा इम्फाल पश्चिम जिल्लाको हेरङ्गोइथोङ अहोङशाङबम लीकाई निवासी अहोङशाङबम पिङ्कुमणि सिंह उर्फ बोयनाओ (३९) लाई पक्राउ गरिएको छ। उनी उग्रवादी सङ्गठन प्री-पाकका स्वघोषित कर्पोरल तथा सक्रिय सदस्य थिए।

पुलिस स्रोतका अनुसार, सोमबार बिष्णुपुर जिल्लाको विशेष कारबाही टोलीले मोइराङ थाङ्गा पार्किङ क्षेत्रबाट उग्रवादी सङ्गठन केवाईकेएलका सक्रिय सदस्य सलाम पुन्शी मैतेई (४४) लाई पक्राउ गरेको थियो। उनी २०२६ सालको जनवरीमा मोइराङ थाना क्षेत्रको लीकाईस्थित एम/एस एलिडास इन्धन केन्द्र (पेट्रोल पम्प) मा ह्यान्ड ग्रेनेड प्रहार गरिएको घटनामा संलग्न थिए।

यसैबीच, सोमबार नै राष्ट्रिय राजमार्ग ३७ मा लागुऔषध ओसारपसार भइरहेको सूचनाका आधारमा जिरीबाम जिल्ला पुलिस र सुरक्षा बलका टोलीले लेइगाङपोकपी गाउँमा जाँच चौकी स्थापना गरेका थिए। यात्रुवाहक सवारीसाधनको जाँच गर्ने क्रममा एक यात्रुसँग रहेको कालो रङको पोलिथिनको झोला बरामद गरिएको थियो।

यस घटनामा मोहम्मद जमाल उद्दीन (४०) लाई पक्राउ गरिएको छ। उनी छिमेकी राज्य असमको कछार जिल्लाअन्तर्गत लखीपुर थाना क्षेत्रको गोन्टाग्राम निवासी हुन्। उनीसँगबाट २.१ किलोग्राम ब्राउन सुगर भएका चारवटा प्याकेट बरामद गरिएको छ।

हिन्दुस्थान समाचार / भवानी थामी