नयाँ दिल्ली, १३ अक्टोबर (हि.स.)। प्रधानमन्त्रीलाई उपहारस्वरूप प्राप्त स्मृतिचिह्नहरूको आठौँ संस्करणको अनलाइन लिलामीमा उत्तराखण्डका पवित्र तीर्थस्थल, लोकपरम्परा तथा क्षेत्रीय पहिचान झल्काउने २७ वटा स्मृति चिह्न समावेश गरिएका छन्। केन्द्रिय संस्कृति मन्त्रालय अनुसार, यी सामग्रीले उत्तराखण्डको समृद्ध आध्यात्मिक तथा सांस्कृतिक सम्पदाको प्रतिनिधित्व गर्छन्। लिलामीबाट प्राप्त सम्पूर्ण रकम ‘नमामि गङ्गे’ कार्यक्रममा समर्पित गरिनेछ।
समावेश गरिएका सामग्रीमा केदारनाथ धामका दुई वटा नमुना, उखीमठ स्थित ओङ्कारेश्वर मन्दिरको नमुना तथा मुखवा स्थित माँ गङ्गा मन्दिरको नक्काशीदार काठको नमुना छन्। यसका साथै बद्रीनाथ, केदारनाथ, गङ्गोत्री र यमुनोत्री चारै धामलाई एकसाथ देखाइएको दुर्लभ तस्बिर, मनसा देवी मन्दिरको तस्बिर, आदि कैलाशको दृश्य, महासू देवता मन्दिरको चित्र तथा कार्तिक स्वामी मन्दिरको एलईडी बत्ती जड़ित काँचको स्मृति चिह्न पनि समावेश छन्।
उत्तराखण्डको नारायण आश्रम र कुमाउँ हिमालयको प्राकृतिक सौन्दर्य झल्काउने तस्बिर पनि सङ्ग्रहमा रहेको छ। राज्यको परम्परागत लोककला ‘ऐपण’ को झलक भित्ते घड़ी तथा माँ दुर्गाको कलाकृतिमा देख्न सकिन्छ। यस बाहेक सात वटा परम्परागत पहाड़ी टोपीले राज्यको सांस्कृतिक पहिचान र परम्परागत पहिरनलाई प्रतिनिधित्व गर्छन्।
यस आध्यात्मिक तथा सांस्कृतिक सङ्ग्रहमा खेलकुद उपलब्धिलाई पनि स्थान दिइएको छ। अन्तरराष्ट्रिय ब्याडमिन्टन खेलाड़ी लक्ष्य सेनले हस्ताक्षर गरेको ब्याडमिन्टन र्याकेट समेत लिलामीमा राखिएको छ, जसले उत्तराखण्डको युवा प्रतिभा र खेलकुद गौरवलाई झल्काउँछ।
मुखवा स्थित गङ्गा मन्दिरको नमुनाले उत्तराखण्डको आध्यात्मिक जीवनमा गङ्गाको महत्त्वलाई उजागर गर्छ। लिलामीबाट सङ्कलित रकम नमामि गङ्गे अभियानमा प्रयोग गरिनेछ, जसबाट गङ्गा नदीको संरक्षण तथा पुनरुत्थान सम्बन्धी कार्यलाई गति मिल्ने अपेक्षा गरिएको छ।
प्रधानमन्त्रीका स्मृति चिह्नहरूको अनलाइन लिलामीको आठौँ संस्करण हाल सञ्चालनमा रहेको छ। यसको अन्तिम मिति बढ़ाएर ३१ अक्टोबर पुर्याइएको छ। इच्छुक नागरिक तथा बोलपत्रदाताले आधिकारिक अनलाइन लिलामी पोर्टल मार्फत बोली लगाउन सक्नेछन्।
/ बिशाल
