नयाँ दिल्ली, 16 अक्टोबर (हि.स.)। ककरोच जनता पार्टी (सीजेपी) ले आज आयोजना गर्न लागेको ‘लहरा दो तिरङ्गा यात्रा’ अघि राष्ट्रिय राजधानी दिल्लीमा तनावपूर्ण वातावरण सिर्जना भएको छ। दिल्ली पुलिसले कनाट प्लेस वरिपरि सुरक्षा व्यवस्था कडा पारेको छ। नयाँ दिल्ली नगरपालिका परिषद् (एनडीएमसी) ले कनाट प्लेसस्थित सेन्ट्रल पार्क दुई दिनका लागि बन्द राख्ने घोषणा गरेको छ। दिल्ली पुलिसले निषेधाज्ञालाई ध्यानमा राख्दै सर्वसाधारणलाई उक्त क्षेत्रबाट टाढा रहन आग्रह गरेको छ। यातायात पुलिसले पनि प्रमुख सडकहरूमा आवागमन प्रभावित हुन सक्ने परामर्श जारी गरेको छ।
यसैबीच, सीजेपी नेता अभिजीत दीपकेले सादा पोसाकमा रहेका पुलिसकर्मीहरूले आफ्नो पिछा गरिरहेको आरोप लगाएका छन्। अधिकारीहरूका अनुसार, सार्वजनिक स्थानमा व्यवस्था कायम राख्न र अप्रिय घटना हुन नदिन आवश्यक कदम चालिएको हो। दिल्ली पुलिसले कनाट प्लेस र छेउछाउका क्षेत्रमा शान्ति कायम राख्न, जनताको सुरक्षा गर्न तथा सम्पत्तिको संरक्षण गर्न भारतीय नागरिक सुरक्षा संहिताको धारा १६३ लागू गरिएको स्पष्ट पारेको छ।
डीसीपी नेहा यादवले बिहिबार साँझ आयोजित पत्रकार सम्मेलनमा नयाँ दिल्ली नगरपालिका परिषद्ले प्रशासनिक कारण देखाउँदै १६ र १७ अक्टोबरमा सेन्ट्रल पार्क बन्द रहने जानकारी पुलिसलाई पत्रमार्फत दिएको बताइन्। एनडीएमसीले उक्त संवेदनशील सार्वजनिक पार्कको सुरक्षाका लागि कडा प्रबन्ध मिलाउन र अनधिकृत व्यक्तिलाई प्रवेश गर्न नदिन पुलिससँग अनुरोध गरेको छ।
व्यापारीहरूले उपद्रवी तत्त्व र गैरकानुनी जमघटका कारण आफ्नो व्यवसायमा नकारात्मक असर परिरहेको बताएका छन्। यस विषयसँग सम्बन्धित एक मुद्दामा दिल्ली उच्च न्यायालयले पनि व्यापारिक गतिविधिमा अवरोध पुग्न सक्ने आशंकालाई ध्यानमा राखेको छ। यसबारे दिल्ली पुलिसले अदालतलाई निवेदकको चिन्तालाई ध्यानमा राख्दै उचित कदम चालिने आश्वासन दिएको छ।
सीजेपीले जारी गरेको प्रेस विज्ञप्तिमा उक्त यात्रालाई आफ्ना नेता आशुतोष रांका र सौरभ दासको समर्थनमा आयोजना गर्न लागिएको उल्लेख गरेको छ। दास र रांकालाई बुधबार पाँच दिनका लागि न्यायिक हिरासतमा पठाइएको छ। उनीहरूले मुख्य निर्वाचन आयुक्त ज्ञानेश कुमारको राजीनामाको माग गर्दै जन्तरमन्तरमा नाराबाजी गरेका थिए। गृह मन्त्रालयले जन्तरमन्तरको विरोध प्रदर्शनस्थलको मान्यता फिर्ता लिएको एक दिनपछि उनीहरूलाई पक्राउ गरिएको थियो।
मुख्य निर्वाचन आयुक्त ज्ञानेश कुमारविरुद्ध सीजेपीको आन्दोलन २ अक्टोबरमा मुम्बईबाट शुरु भएको थियो। पार्टीले १० अक्टोबरमा दिल्लीमा आन्दोलन गर्ने घोषणा गरेको थियो। अभिजीत दीपके, सौरभ दास र आशुतोष रांकालाई दिल्ली विमानस्थलमा ओर्लिनेबित्तिकै हिरासतमा लिइएको थियो।
दिल्ली पुलिसले जारी गरेको विज्ञप्तिमा सीजेपीलाई राष्ट्रिय झण्डा बोकेर राष्ट्रगान गाउने ११ जनाको समूहलाई मात्र प्रदर्शन गर्न अनुमति दिने विषयमा विचार गर्न सकिने बताइएको छ। कनाट प्लेस र छेउछाउका क्षेत्रमा निषेधाज्ञा लागू रहेकाले कुनै पनि प्रकारको उल्लङ्घन भए कानुनी कारबाही गरिने पुलिसले स्पष्ट पारेको छ।
हिन्दुस्थान समाचार / भवानी थामी
15 Oct 2026
