नयाँ दिल्ली, 16 अक्टोबर (हि.स.)। ककरोच जनता पार्टी (सीजेपी) ले आज आह्वान गरेको 'लहरा दो तिरंगा‘ यात्रालाई ध्यानमा राख्दै दिल्ली ट्राफिक पुलिसले २१ प्रमुख मार्गमा यातायात परिवर्तन गर्ने योजना तयार पारेको छ। कनाट प्लेस र छेउछाउका क्षेत्रमा ११ हजारभन्दा बढी सुरक्षाकर्मी तैनाथ गरिएको छ।

दिल्ली पुलिसका अनुसार, उक्त यात्राका लागि अनुमति दिइएको छैन। शान्ति तथा कानून-व्यवस्था कायम राख्न नयाँ दिल्ली क्षेत्रमा भारतीय नागरिक सुरक्षा संहिताको धारा १६३ लागू गरिएको छ। यसअन्तर्गत अनुमति नलिई प्रदर्शन गर्ने, जुलुस निकाल्ने र भीड जम्मा गर्ने कार्यमा प्रतिबन्ध लगाइएको छ।

कनाट प्लेस, राजीव चौक, जन्तरमन्तर, संसद मार्ग र पालिका बजारलगायत लुटियन्स दिल्लीका प्रमुख क्षेत्रमा पुलिस तथा सुरक्षा बलको तैनाथी बढाइएको छ। सुरक्षा व्यवस्थाका लागि तीन सिफ्टमा ११ हजारभन्दा बढी सुरक्षाकर्मी परिचालन गरिएको छ। यसमा दिल्ली पुलिसका ६ हजारभन्दा बढी जवानका साथै केन्द्रिय सशस्त्र पुलिस बल (सीएपीएफ) का करिब २२० कम्पनी र द्रुत कारबाही बल (आरएएफ) का टोली समावेश छन्। यसबाहेक आवश्यकताअनुसार तत्काल परिचालन गर्न सकिने गरी करिब पाँच हजार अतिरिक्त पुलिस कर्मीलाई सुरक्षित अवस्थामा राखिएको छ।

कनाट प्लेस र राजीव चौक छेउछाउका क्षेत्रमा अवरोधकहरू थपिएका छन्। प्रमुख स्थानमा दङ्गा नियन्त्रण वाहनलगायत अन्य सवारीसाधन तैनाथ गरिएका छन्। संवेदनशील क्षेत्रमा ड्रोन र सीसीटीभी क्यामेरामार्फत निगरानी भइरहेको छ। पुलिसले आफ्ना जवानहरूलाई भीडको गतिविधिमाथि निगरानी राख्न र कुनै पनि अप्रिय परिस्थितिको सामना गर्न सतर्क रहन निर्देशन दिएको छ।

कनाट प्लेसस्थित सेन्ट्रल पार्क आज र भोलि सर्वसाधारणका लागि बन्द राख्ने निर्णय गरिएको छ। पार्क छेउछाउ अवरोधकहरू राखेर पुलिस बल तैनाथ गरिएको छ। पुलिसले सर्वसाधारणलाई प्रतिबन्धित क्षेत्रमा प्रवेश नगर्न र अनुमति नलिई भीड जम्मा नगर्न आग्रह गरेको छ। पुलिसका अनुसार, नियमको पालना गर्दै सीमित सङ्ख्यामा मानिसहरूलाई निर्धारित स्थानमा राष्ट्रिय झण्डा फहराउन र राष्ट्रगान गाउन अनुमति दिन सकिनेछ।

प्रस्तावित यात्रालाई ध्यानमा राख्दै दिल्ली ट्राफिक पुलिसले पनि सर्वसाधारणका लागि परामर्श जारी गरेको छ। शुक्रबार दिउँसो ३ बजीदेखि कनाट प्लेस र छेउछाउका क्षेत्रमा यातायात प्रभावित हुने आशङ्का गरिएको छ। आवश्यकताअनुसार करिब २१ प्रमुख मार्गमा सवारीसाधनको मार्ग परिवर्तन गर्न सकिनेछ। यसमा संसद मार्ग, बाबा खड्ग सिंह मार्ग, बाराखम्बा रोड, केजी मार्ग, अशोक रोड, मिन्टो रोड र तिलक मार्ग प्रमुख छन्।

यसका अतिरिक्त कनाट प्लेससँगै आईटीओ, मण्डी हाउस, इन्डिया गेट र डीडीयू मार्गमा पनि सवारीसाधनको चाप बढ्ने सम्भावना छ। ट्राफिक पुलिसले अनावश्यक रूपमा कनाट प्लेस र नयाँ दिल्लीका मध्यवर्ती क्षेत्रमा नजान सर्वसाधारणलाई सुझाव दिएको छ। यात्रुहरूलाई वैकल्पिक मार्ग प्रयोग गर्न र सम्भव भएसम्म मेट्रोबाट यात्रा गर्न आग्रह गरिएको छ।

पुलिस अधिकारीहरूका अनुसार, सुरक्षा व्यवस्था र यातायातसम्बन्धी प्रतिबन्ध परिस्थितिअनुसार लागू रहनेछन्। सर्वसाधारणलाई प्रहरीको निर्देशन पालना गर्दै शान्ति तथा कानून-व्यवस्था कायम राख्न सहयोग गर्न अपील गरिएको छ।

उल्लेखनीय छ, सीजेपी प्रमुख अभिजीत दीपकेले बिहिबार सर्वसाधारणलाई शुक्रबार साँझ ५ बजी तिरङ्गा यात्रामा सहभागी हुन आह्वान गरेका छन्। सीजेपी, वामपन्थी दलहरू, विपक्षी पार्टीहरू तथा विद्यार्थी सङ्गठनहरूले मुख्य निर्वाचन आयुक्त ज्ञानेश कुमारको राजीनामा र मतदाता सूचीको विशेष गहन पुनरीक्षण (एसआईआर) प्रक्रिया तत्काल रोक्न माग गर्दै उक्त विरोध प्रदर्शन गर्न लागेका हुन्।

हिन्दुस्थान समाचार / भवानी थामी