गजिङ, 02 अक्टोबर (हि.स.)। पर्यटन तथा नागरिक उड्डयन मन्त्री तथा युक्सम-टाशीडिङका विधायक छिरिङ टी. भोटिया निर्वाचन क्षेत्रको धुप्पीडाँडास्थित सरकारी जुनियर हाई स्कूलमा आयोजित गान्धी जयन्ती समारोहमा मुख्य अतिथिका रूपमा सहभागी भए। महात्मा गान्धीको १५७औँ जयन्तीका अवसरमा आयोजित बहुदिने कार्यक्रम २३ सेप्टेम्बरदेखि शुरु भएको थियो।
सम्बोधनका क्रममा मन्त्री भोटियाले गान्धी जयन्तीको शुभकामना व्यक्त गर्दै महात्मा गान्धीका सत्य र अहिंसाका सिद्धान्त तथा सत्याग्रह आन्दोलनमार्फत भारतीय स्वतन्त्रता सङ्ग्राममा पुर्याएको योगदानबारे चर्चा गरे। उनले गान्धीका मूल्य र आदर्शलाई उजागर गर्ने शैक्षिक तथा सन्देशमूलक कार्यक्रम प्रस्तुत गरेकोमा विद्यार्थीहरूको सराहना गरे। उनले राज्य सरकारले जनकल्याण र समग्र विकासका लागि सञ्चालन गरिरहेका विभिन्न विकास तथा कल्याणकारी योजनाबारे पनि जानकारी दिए।
युक्सम-टाशीडिङका विधायकका रूपमा उनले निर्वाचन क्षेत्रमा सडक मर्मत, विस्तार तथा कालोपत्रे, पूर्वाधार विकास र शिक्षा, स्वास्थ्य तथा पर्यटन क्षेत्रका संरचनाको पुनर्निर्माण तथा सुदृढीकरणलगायत जारी र प्रस्तावित विकास कार्यबारे जानकारी दिए। ग्रामीण पूर्वाधार सुदृढ गर्दै पर्यटन, शिक्षा, सडक सम्पर्क तथा आवश्यक पूर्वाधारको विकासलाई प्राथमिकता दिने आफ्नो दृष्टिकोण पनि उनले प्रस्तुत गरे।
समारोहको समापन आज टाइगर फाइभ फुटसल प्रतियोगिताको फाइनल खेलसँगै भयो। समारोहमा विद्यालयका विद्यार्थी तथा स्थानीय सांस्कृतिक टोलीले सांस्कृतिक प्रस्तुति दिएका थिए।
हिन्दुस्थान समाचार / बिशाल
