सोफिया/मस्को, ०२ नोभेम्बर (हि.स.)। बुल्गेरियाकी कार्यवाहक राष्ट्रपति तथा बुल्गेरियन सोसलिस्ट पार्टी (बीएसपी) की वरिष्ठ नेतृ इलियाना इओटोभाले राष्ट्रपति चुनाउको दोस्रो चरणमा विजय हासिल गरेकी छन्। केन्द्रिय निर्वाचन आयोग (सीईसी) ले सोमबार शतप्रतिशत निर्वाचनसम्बन्धी विवरणको प्रक्रिया पूरा गरेपछि आधिकारिक नतिजा सार्वजनिक गरेको हो।

आधिकारिक नतिजाअनुसार, इओटोभाले कुल ५७.५७ प्रतिशत मत प्राप्त गरेकी छन् भने उनका प्रतिद्वन्द्वी तथा कार्यवाहक प्रधानमन्त्री आन्द्रेई ग्युरोभले ३९.४८ प्रतिशत मत प्राप्त गरेका छन्।

रुसको समाचार संस्था रिया नोभोस्ती तथा टर्की सरकारी समाचार संस्था अनाडोलुका अनुसार, निर्वाचनअघि सार्वजनिक मत सर्वेक्षणले पनि इओटोभाको स्पष्ट अग्रताको सङ्केत गरेको थियो। पाँच प्रमुख सर्वेक्षण संस्थाका अनुमानमा उनले ५६.६ देखि ५८.२ प्रतिशतसम्म मत प्राप्त गर्ने सम्भावना देखाइएको थियो।

निर्वाचनको प्रारम्भिक नतिजा सार्वजनिक भएपछि ग्युरोभले आफ्नो पराजय स्वीकार गरेका थिए। सोफियामा आयोजित पत्रकार सम्मेलनमा उनले नतिजा स्वीकार गर्दै निर्वाचन अभियान समाप्त भए पनि देशप्रतिको जिम्मेवारी समाप्त नहुने बताएका थिए।

निर्वाचन प्रचारका क्रममा इओटोभाले युक्रेन युद्धको कूटनीतिक समाधानमा जोड दिएकी थिइन्। उनले युक्रेनलाई थप हतियार उपलब्ध गराउने नीतिको विरोध गर्दै शान्तिवार्तामार्फत युद्ध अन्त्य गर्नुपर्ने धारणा राखेकी थिइन्। अर्कोतर्फ ग्युरोभले युरोपेली सङ्घ र उत्तर एट्लान्टिक सन्धि सङ्गठन (नेटो) सँगको सहकार्य सुदृढ बनाउनुपर्ने तथा युक्रेनलाई समर्थन गर्नुपर्ने पक्षमा आफ्नो धारणा राखेका थिए।

निर्वाचनको पहिलो चरणमा इओटोभाले ३४.७६ प्रतिशत र ग्युरोभले ३१.९५ प्रतिशत मत प्राप्त गरेका थिए। दोस्रो चरणमा इओटोभाले आफ्नो अग्रतालाई निर्णायक विजयमा परिणत गरिन्।

इओटोभा यसअघि पूर्वराष्ट्रपति रुमेन रादेभको कार्यकालमा उपराष्ट्रपति थिइन्। गत जनवरीमा रादेभले राजीनामा दिएपछि उनले कार्यवाहक राष्ट्रपतिको जिम्मेवारी सम्हालेकी थिइन्।

यसअघि अप्रेलमा सम्पन्न संसदीय निर्वाचनमा रादेभ नेतृत्वको ‘प्रोग्रेसिभ बुल्गेरिया’ पार्टीले २४० सदस्यीय राष्ट्रिय सभामा १३१ सिट जितेर स्पष्ट बहुमत हासिल गरेको थियो। उक्त पार्टीले इओटोभाको राष्ट्रपति पदको उम्मेदवारीलाई समर्थन गरेको थियो।

निर्वाचन अभियानका क्रममा युरोपेली सङ्घ, नेटो तथा युक्रेन युद्धसम्बन्धी नीतिगत मतभेद दुवै उम्मेदवारबीचको प्रमुख चुनावी मुद्दा बनेका थिए। इओटोभाले कूटनीति र शान्तिवार्तालाई प्राथमिकता दिएकी थिइन् भने ग्युरोभले पश्चिमी राष्ट्रहरूसँगको सहकार्य र युक्रेनलाई निरन्तर समर्थन गर्नुपर्ने धारणा राखेका थिए।

हिन्दुस्थान समाचार / बिशाल