कोलकाता, 25 मार्च (हि.स.)। पश्चिम बंगालमा आगामी महिना हुने दुई चरणको विधानसभा निर्वाचनअघि मुख्यमन्त्री ममता ब्यानर्जीले मंगलबार राति आफूले सम्हालेका विभिन्न “लाभका पद” हरूबाट राजीनामा दिएकी छन्। आचारसंहिता लागू भइसकेको र निर्वाचन आयोगको निगरानीबीच यस कदमलाई प्रशासनिक पारदर्शितासँग जोडेर हेरिएको छ। ममता ब्यानर्जी दक्षिण कोलकाताको भवानीपुरबाट अखिल भारतीय तृणमूल कांग्रेसकी उम्मेदवार हुन्।
मुख्यमन्त्रीको यी पदहरूबाट राजीनामापछि राज्य प्रशासनले आवश्यक औपचारिकता पूरा गर्ने प्रक्रिया शुरु गरेको छ। राज्य सचिवालय नवान्नका एक स्रोतका अनुसार, सम्बन्धित विभागहरूलाई उनको राजीनामा छिट्टै स्वीकृत गर्न र निर्धारित समयभित्र यस सम्बन्धमा प्रतिवेदन पेश गर्न निर्देशन दिइएको छ। स्रोतका अनुसार, मुख्यमन्त्रीले पर्यावरण, वन, स्वास्थ्य तथा अल्पसंख्यक कार्य विभागलगायत विभिन्न विभागसँग सम्बन्धित लाभका पदहरूबाट राजीनामा दिएकी हुन्।
यसका अतिरिक्त उनले पश्चिम बंगाल राज्य आपदा प्रबन्धन प्राधिकरण र पश्चिम बंगाल लोक नीति तथा योजना बोर्डजस्ता संस्थाहरूमा रहेका आफ्ना पदहरूबाट पनि राजीनामा दिएकी छन्। अखिल भारतीय तृणमूल कांग्रेसका एक वरिष्ठ नेता तथा राज्य मन्त्रिपरिषद्का सदस्यका अनुसार पारदर्शिताको सन्देश दिनका लागि मुख्यमन्त्रीले यो निर्णय लिएकी हुन्, यद्यपि उनको लागि यस्तो गर्नु अनिवार्य भने थिएन।
भारतीय जनता पार्टीले भवानीपुरबाट मुख्यमन्त्रीविरुद्ध पश्चिम बंगाल विधानसभाका प्रतिपक्ष नेता शुभेन्दु अधिकारीलाई उम्मेदवार बनाएको छ। शुभेन्दु अधिकारी पूर्वी मेदिनीपुर जिल्लाको नन्दीग्रामबाट पनि चुनाउ लडिरहेका छन्, जहाँबाट उनी हाल विधायक हुन् र यस क्षेत्रको दुई पटक प्रतिनिधित्व गरिसकेका छन्।
---------------
हिन्दुस्थान समाचार / भवानी थामी
