चण्डीगढ़, 25 मार्च (हि.स.)। पंजाब पुलिसले बलात्कार तथा अन्य आरोपहरूमा घेरिएका सनौर क्षेत्रका आम आदमी पार्टी (आप) का विधायक हरमीत सिंह पठानमाजरालाई मध्य प्रदेशबाट पक्राउ गरेको छ। पठानमाजरा विगत केही महिनादेखि फरार थिए। १ सेप्टेम्बर, २०२५ मा पंजाबको पटियालास्थित सिभिल लाइन्स थानामा एक महिलाले बलात्कार, ठगी तथा अन्य आरोप लगाउँदै उनीविरुद्ध मुद्दा दर्ता गराएकी थिइन्।

महिलाले आरोप लगाएकी छन्, २०१३-२०१४ देखि २०२४ सम्म (विशेषगरी १२ फरवरी २०१४ देखि १२ जून २०२४ सम्म) पठानमाजराले आफूलाई तलाक भइसकेको भन्दै विवाहको प्रलोभन दिँदै शारीरिक सम्बन्ध बनाएका थिए। सन् २०२१ मा लुधियानाको एक गुरुद्वारामा उनीहरूको विवाह पनि भएको थियो, तर पठानमाजरा पहिले नै विवाहित थिए।

यसपछि २ सेप्टेम्बरमा हरियाणाको करनालमा उनलाई पक्राउ गरिएको थियो, तर पुलिस हिरासतबाट गोलीबारी र ढुंगामुढाको आडमा उनी फरार भएका थिए। यस क्रममा एक पुलिस कर्मचारी घाइते भएका थिए। त्यसपछि यो मुद्दा अदालतमा पुगेको थियो।

दिसम्बर २०२५ मा पटियाला अदालतले उनलाई फरार (भगोड़ा) घोषित गरेको थियो। त्यसपछि उनी अष्ट्रेलिया भागेको र त्यहाँबाट अन्तर्वार्ता दिएको खबर आएको थियो। त्यसपछि अदालतले लुकआउट नोटिस जारी गरेको थियो।

पटियालाका एसएसपी वरुण शर्माका अनुसार मंगलबार राति मध्य प्रदेशको ग्वालियर नजिक शिवपुरी जिल्लाबाट उनलाई पक्राउ गरिएको हो। आरोपी विधायकसँगै उनका तीन सहयोगीलाई पनि पक्राउ गरिएको छ। उनलाई पटियाला ल्याइएको छ।

---------------

हिन्दुस्थान समाचार / भवानी थामी