पाकिम, 13 अप्रेल (हि.स.)। पाकिमका जिल्लापाल रोहन अगावानेको अध्यक्षतामा सोमवार जिल्ला प्रशासनिक केन्द्र, पाकिममा जीवन्त गाउँ कार्यक्रम II को बैठक आयोजन गरिएको छ। यस कार्यक्रमले समृद्धि र सुरक्षा सुनिश्चित गर्दै सीमा क्षेत्रहरूमा जीवनस्तर बढ़ाउने र दिगो जीविकोपार्जनका अवसरहरू सिर्जना गर्ने लक्ष्य राखेको छ।

बैठकको क्रममा जिल्लापालले सहभागीहरूलाई जीवन्त गाउँ कार्यक्रम II अन्तर्गत आगामी पहलबारे जानकारी गराए र कार्यक्रमको उद्देश्यसँग मिल्दोजुल्दो परियोजनाहरू विकास गर्न 10 वटा हस्तक्षेप क्षेत्रलाई निर्देशन दिए। उनले रूपरेखाका पाँच प्रमुख पक्षमा ध्यान केन्द्रित गर्दै भूमि उपलब्धता, कार्यान्वयन एजेन्सी, व्यापार मोडल, राजस्व उत्पादन रणनीति र लाइन विभागहरूसँगको सहकार्यात्मक दृष्टिकोणमाथि जोड़ दिए।

यस अवसरमा परियोजनाको दृष्टिकोण, कार्यान्वयन रणनीति र सम्भावित चुनौतीलाई सम्बोधन गर्ने उपायहरूमा पनि विस्तृत छलफल गरियो। थप रूपमा, परियोजना ढाँचाको सिंहावलोकनमाथि पनि संक्षिप्तमा छलफल गरियो।

यसका साथै कार्यक्रम निर्देशिकाअनुसार सहभागीहरूलाई पाँच राजस्व खण्डका लागि दश हस्तक्षेप क्षेत्र र सोह्र राजस्व खण्डका लागि चार विषयगत क्षेत्र समेट्ने भूमि विवरणसहित परियोजना प्रस्ताव तयार गरी पेश गर्न निर्देशन दिइएको थियो।

जिल्ला प्रशासनिक केन्द्रले परियोजनाको ढाँचा प्रदान गर्ने र आगामी दिनहरूमा प्रगति मूल्याङ्कन गर्न समीक्षा बैठक आयोजना गर्ने भनी थप जानकारी दिइएको थियो।

बैठकमा पञ्चायत अध्यक्ष, अतिरिक्त जिल्लापाल (मुख्यालय) सवीन्द्र राई, पाकिमका अतिरिक्त जिल्लापाल पुलकित, रेगुका खण्ड विकास अधिकारी अनिल गिरीसहित अन्यको उपस्थिति रहेको थियो।

हिन्दुस्थान समाचार / बिशाल