गान्तोक, 24 मई (हि.स.)। चौथो डोड्रुप्छेन रिम्पोछे परम पावन क्याबगों डोड्रुप्छेन जिग्मी थुप्टेन त्रिन्ले पाल्जाङपोको ‘कुदुङ’ को पवित्र अन्तिम यात्रा र अभिषेक समारोहमा आज हजारौं भक्तजन, भिक्षु र प्रतिष्ठित व्यक्तिहरूले भाग लिए। पवित्र यात्रा 'त्सामखाङ' स्थित लुकश्यामा शाही श्मशान गृह परिसरबाट शुरु भयो र परम्परागत बौद्ध अनुष्ठान र भिक्षु अनुष्ठान अनुसार आयोजित भव्य ‘सेरबाङ’ शोभायात्राको रूपमा देवराली छोर्तेन गुम्पा पुग्यो।

यस अवसरमा हजारौंको संख्यामा भक्तजन मार्गमा लाइनमा उभिएर खदा एवं पुष्प अर्पण गरे। यसैगरी, विभिन्न गुम्पा, बौद्ध संस्था, विद्यालय र सामुदायिक समूहहरूले विभिन्न ठाउॅंमा पवित्र यात्रालाई औपचारिक स्वागत गरेका थिए।

पवित्र यात्रा दिउँसो लगभग 3 बजी देवराली छोर्तेन गुम्पा पुग्यो, जहाँ सिक्किमका मुख्यमन्त्री प्रेमसिंह तामाङ, मन्त्री पिन्चो छोपेल लेप्चा, ग्याल्से राजकुमार पाल्देन नामग्याल र अन्य विशिष्ट व्यक्तिहरूले औपचारिक रूपमा स्वागत गरे।

प्रख्यात लामाहरूको सल्लाह पालना गर्दै देवराली छोर्तेन गुम्पामा पवित्र कुदुङको अन्तिम विश्रामस्थलको रूपमा स्वर्ण अवशेष स्तूप तयार पारिएको थियो। यस अवसरमा मुख्यमन्त्रीले 'कुसुम मेन्डेल' अर्पण गरे र 'थोङड्रोल खाङजाङ' को पनि उद्घाटन गरे, जसमा रिम्पोछेले आफ्नो जीवनकालमा प्रयोग गरेका पवित्र अवशेषहरू र व्यक्तिगत वस्तुहरू छन्।

हजारौं भक्तजनको उपस्थितिमा सम्पन्न पवित्र प्रतिष्ठित समारोह प्रार्थना र परम्परागत बौद्ध अनुष्ठानहरूले परिपूर्ण थियो। स्वर्ण अवशेष स्तूप चौथो डोड्रुप्छेन रिम्पोछेको विरासत, करुणा र शिक्षाको प्रतीकको रूपमा स्थायी आध्यात्मिक स्थल बन्ने अपेक्षा गरिएको छ।

हिन्दुस्थान समाचार / बिशाल