फिरोजाबाद, 12 जून (हि.स.)। उत्तर प्रदेशको फिरोजाबाद रेलवे स्टेशन नजिकै लखनउ-दिल्ली शताब्दी एक्सप्रेसमाथि बिहिबार साँझ ढुङ्गा प्रहार गरिएको घटना सार्वजनिक भएको छ। यही रेलमा संघ प्रमुख मोहन भागवत पनि यात्रा गरिरहेका थिए। घटनापछि पुलिसले रात घटनास्थल वरपर अनुसन्धान सञ्चालन गरेको छ।
लखनउबाट दिल्ली जाँदै गरेको शताब्दी एक्सप्रेसलाई मक्खनपुर र फिरोजाबाद रेलवे स्टेशनबीच पर्ने पेमेश्वर गेट नजिक केही अज्ञात असामाजिक तत्वहरूले निशाना बनाएका थिए। घटना सार्वजनिक भएसँगै रेलवे प्रशासन र सुरक्षा निकायहरू सतर्क भए।
आरएसएस प्रमुख मोहन भागवत कानपुरमा आयोजित एक कार्यक्रममा सहभागी भएपछि शताब्दी एक्सप्रेसमार्फत दिल्ली फर्किरहेका थिए। यद्यपि, उक्त घटनामा उनी पूर्ण रूपमा सुरक्षित रहेका छन्। उनलाई वा अन्य कुनै यात्रुलाई चोटपटक लागेको छैन।
रेल टुन्डला स्टेशन पुगेपछि आरपीएफ निरीक्षक अवधेश गोस्वामीले आफ्नो टोलीसहित सम्बन्धित डिब्बाको निरीक्षण गरेका थिए। जाँचका क्रममा रेलको बाहिरको सिसा मात्र फुटेको र सबै यात्रु सुरक्षित रहेको पुष्टि भएको छ।
घटनाको जानकारी पाएपछि पुलिसका उच्च अधिकारीहरू, स्थानीय गुप्तचर एकाई (एलआईयू) तथा अन्य सुरक्षा निकायहरूले घटनास्थलका सीसीटीभी फुटेजहरूको अध्ययन गर्दै अनुसन्धान अघि बढाएका छन्।
रेलवे अधिकारीहरूका अनुसार, मोहन भागवत ई-1 कोचको सिट नम्बर ३९ र ४० मा यात्रा गरिरहेका थिए।
यस सम्बन्धमा वरिष्ठ पुलिस अधीक्षक आदित्य लांग्हेले रेलमाथि ढुङ्गा प्रहार भएको पुष्टि गर्दै घटनाको अनुसन्धानका लागि सातवटा पुलिस टोली गठन गरिएको बताएका छन्। उनले सीसीटीभी फुटेजको अध्ययन भइरहेको र घटनामा संलग्न जो कोहीलाई पनि पक्राउ गरिने बताएका छन्।
---------------
हिन्दुस्थान समाचार / भवानी थामी
