नयाँ दिल्ली, 13 जून (हि.स.)। प्रधानमन्त्री नरेन्द्र मोदीको फ्रान्स र स्लोवाक गणतन्त्रको महत्वपूर्ण 6 दिवसीय औपचारिक भ्रमण शनिवारदेखि शुरु भएको छ। उनको भ्रमण 18 जूनमा सम्पन्न हुनेछ।
प्रस्थान गर्नुअघि प्रधानमन्त्री मोदीले यात्राको मुख्य उदेश्य र कार्यक्रमको रेखांकन गर्दै एक्समा लेखेका छन्, फ्रान्सका राष्ट्रपति इमानुएल म्याक्रोन र स्लोवाक गणतन्त्रका प्रधानमन्त्री रोबर्ट फिकोको निमन्त्रणामा यो यात्रा भएको हो। यात्राको पहिलो चरणमा उनी फ्रान्सको नीस शहर पुग्नेछन्।
फ्रान्स यात्राको सन्दर्भमा प्रधानमन्त्री मोदीले भने, भारतको रणनीतिक दृष्टिकोणमा फ्रान्सको विशेष स्थान छ। यस वर्षको शुरूआतमा राष्ट्रपति म्याक्रोनको भारत यात्राको क्रममा हाम्रो सम्बन्धलाई 'विशेष विश्वव्यापी रणनीतिक साझेदारी' को दर्जा दिइएको थियो। अब हामी फरवरीदेखि भएको प्रगतिको समीक्षा गर्नेछौं।
उनले 14 जूनमा आफू र राष्ट्रपति म्याक्रोनले संयुक्त रूपमा ‘इन्डिया इनोभेट्स’ कार्यक्रमको उद्घाटन गर्ने बताए। 'भारत-फ्रान्स इनोभेसन इयर' अन्तर्गत आयोजित यो कार्यक्रमले भारतीय स्टार्टअपहरूलाई विश्वव्यापी लगानीकर्ताहरूसँग जोड्नेछ।
नीसपछि प्रधानमन्त्री 14-15 जूनमा स्लोवाक गणतन्त्रको राजधानी ब्राटिस्लावाको लागि प्रस्थान गर्नेछन्। वर्ष 1993 मा स्लोवाकिया स्वतन्त्र राष्ट्र बनेपछि भारतीय प्रधानमन्त्रीको स्लोवाकियाको यो पहिलो यात्रा हुनेछ।
प्रधानमन्त्री मोदीले राष्ट्रपति पेलेग्रिनी र प्रधानमन्त्री रोबर्ट फिकोसँग द्विपक्षीय वार्ता गर्नेछन्। त्यसपछि उनले स्लोवाकियाका प्रमुख 'बिजनेस लीडर्स' सँग भेट गर्नेछन्। यात्राको उद्देश्य भारत-ईयू मुक्त व्यापार सम्झौता (एफटीए) को गतिलाई तीव्र पार्नु र ईयूसँग रणनीतिक साझेदारीलाई सुदृढ़ पार्नु हो।
स्लोवाकियाबाट प्रधानमन्त्री मोदी सिधै एवियन (फ्रान्स) पुग्नेछन्, जहाँ उनले 16 र 17 जूनमा हुने जी7 शिखर सम्मेलनमा भाग लिनेछन्।
उनले भने, जी7 मा भारतको उपस्थितिले देशको बढ्दो विश्वव्यापी पहिचान मात्र प्रतिबिम्बित गर्दैन तर भारतले 'ग्लोबल साउथ' (विकासशील र गरीब देशहरू) को आकांक्षा र मुद्दाहरूलाई पनि प्रमुख आवाज दिनेछ।
प्रधानमन्त्रीले आफ्नो यात्रा 18 जूनमा पेरिसमा सम्पन्न गर्ने बताए। पेरिसमा राष्ट्रपति म्याक्रोनसँग युरोपको सबैभन्दा ठूलो टेक्नोलोजी र इनोभेसन शो 'वीवा टेक 2026' मा सहभागी हुनेछन्। यो वर्ष यो शोमा अहिलेसम्मकै सबैभन्दा ठूलो ‘भारतीय राष्ट्रिय मण्डप’ बनाइएको छ।
यसका साथै उनले पेरिसमा बसोबास गर्ने भारतीय समुदायसँग पनि कुराकानी गर्नेछन्।
उल्लेखनीय छ कि जी7 शिखर सम्मेलनमा भारतलाई विशेष निमन्त्रणा गरिएको यो लगातार आठौं पटक हो।
हिन्दुस्थान समाचार / भवानी थामी
