बैतूल, 18 जून (हि.स.)। राष्ट्रपति द्रौपदी मुर्मुले विकास र संस्कृति बीचको सन्तुलन बलियो एवं समृद्ध समाजको जग भएको बताइन्। सार्थक विकास त्यो हो जसले हाम्रा जरा र मूल्यहरूबाट पोषण प्राप्त गर्छ र तिनीहरूलाई बलियो पनि बनाउँछ।

राष्ट्रपति द्रौपदी मुर्मुले बिहिवार मध्य प्रदेशको बैतूलमा प्रजापिता ब्रह्माकुमारी ईश्वरी विश्वविद्यालयद्वारा आयोजित आध्यात्मिक जागरण मार्फत आदिवासी समाजको सशक्तिकरण विषयक महासम्मेलनलाई सम्बोधन गरिरहेकी थिइन्। उनले भनिन्, उपभोगको संस्कृतिमा आधारित आजको द्रुत गतिको संसारमा, समाजको प्रत्येक वर्गको आध्यात्मिक शुद्धता महत्त्वपूर्ण भएको छ। यो दीर्घकालीन, समतावादी आचरण प्रणाली र प्राकृतिक स्रोतहरूप्रति संवेदनशील जीवनशैली विकास गर्ने आधार हो।

राष्ट्रपति मुर्मुले भनिन्, समाजको वास्तविक सशक्तिकरण तब हुन्छ जब व्यक्तिहरू आत्मविश्वास, आत्मसम्मान र जागरूकताले सशक्त हुन्छन्, सामाजिक जिम्मेवारीको भावनाका साथ आफ्नो क्षेत्रमा सक्रिय हुन्छन्। जब आध्यात्मिकता र सेवा एकसाथ मिल्छन्, समाजमा स्थायी परिवर्तन हुन्छ।

बैतूलको कार्यक्रम स्थलमा आइपुगेपछि राष्ट्रपतिले पहिले बिरुवा रोपिन्। त्यसपछि उनले विभिन्न विभागहरूद्वारा स्थापित प्रदर्शनीहरूको नजिकबाट निरीक्षण गरिन्। लाल बहादुर शास्त्री स्टेडियममा मुख्य कार्यक्रम राष्ट्रियगीत र राष्ट्रगान गायनबाट शुरु भयो। त्यसपछि राष्ट्रपतिले दीप प्रज्वलन गरिन् र भव्य सम्मेलनको औपचारिक उद्घाटन गरिन्। उनलाई मञ्चमा स्मृति चिन्हले सम्मानित गरियो। यस अवसरमा कलाकारहरूले भव्य सम्मेलनको औपचारिक शुरुवात गर्दै मनमोहक सांस्कृतिक प्रस्तुतिहरू पनि प्रस्तुत गरे।

यस महासम्मेलनको अध्यक्षता मध्य प्रदेशका राज्यपाल मंगुभाई पटेलले गरे। मञ्चमा केन्द्रिय राज्यमन्त्री दुर्गादास उईके, राज्यमन्त्री नरेन्द्र शिवाजी पटेल र संस्थाका ओडिशा प्रभारी डा. नाथमल उपस्थित रहे। माउन्ट आबुबाट आएकी लीना बहेन र शैलजा बहेन लगायत अन्य विशिष्ट अतिथिहरूले पनि आफ्नो विनम्र उपस्थितिले कार्यक्रमलाई शोभायमान बनाए।

आफ्नो सम्बोधन पूरा गरेपछि राष्ट्रपति मुर्मु कड़ा सुरक्षाबीच खण्डवा जिल्लाको ओंकारेश्वर प्रस्थान गरिन्, जहाँ आराम गरेपछि उनले साँझ ओंकारेश्वर-मामलेश्वर ज्योतिर्लिंगको दर्शन गर्नेछिन् र साँझको आरतीमा भाग लिनेछिन्।

हिन्दुस्थान समाचार / भवानी थामी