नयाँ दिल्ली, ३० जून (हि.स.)। प्रधानमन्त्री नरेन्द्र मोदीले आफ्नो तीनदिने सेशेल्स भ्रमणका क्रममा भारतको समृद्ध हस्तकला तथा हथकरघा परम्परालाई अन्तरराष्ट्रिय मञ्चमा प्रस्तुत गर्दै त्यहाँका शीर्ष नेताहरूलाई विभिन्न राज्यका परम्परागत कलाकृति तथा वस्त्र उपहारस्वरूप प्रदान गरेका छन्।

प्रधानमन्त्री मोदीले सेशेल्सका राष्ट्रपति पेल्ट्रिक हमिनीलाई उत्तर प्रदेशको मुरादाबादका कारीगरहरूले हातैले तयार पारेको पित्तलको कछुवा उपहार दिएका छन्। धातु ढलाइ, नक्काशी तथा आकर्षक फिनिसिङका लागि प्रसिद्ध यो कलाकृतिले मुरादाबादको पुस्तौंदेखिको हस्तकलात्मक सीपलाई झल्काउँछ। भारतीय दर्शनमा कछुवालाई बुद्धिमत्ता, स्थिरता, धैर्य तथा दीर्घायुको प्रतीक मानिन्छ। सेशेल्समा पाइने विश्वप्रसिद्ध एल्डाब्रा जायन्ट कछुवासँग यसको विशेष सम्बन्ध रहेकाले यो उपहार दुवै देशबीचको मित्रता र साझा मूल्यहरूको प्रतीक बनेको छ।

प्रथम महिला वेरोनिक हर्मिनीलाई मध्य प्रदेशको महेश्वरी रेशमी स्टोल तथा कर्नाटकको प्रसिद्ध बिदरीवेयर बाकस उपहार प्रदान गरिएको छ। महेश्वरी स्टोल आफ्नो हल्का बनावट, आकर्षक डिजाइन तथा रेशम–कपासको उत्कृष्ट संयोजनका लागि परिचित छ। त्यस्तै, बिदरीवेयर बाकस कालो धातुको सतहमा चाँदीको सुन्दर नक्काशी गरिएको भारतको प्रसिद्ध धातुकला परम्पराको उत्कृष्ट नमुना हो।

उपराष्ट्रपति लाई सिक्किमको अर्किड कला चित्रकला उपहार दिइएको छ। उक्त चित्रमा भारतको राष्ट्रिय पक्षी मयूरलाई अर्किड फूलहरूको बीचमा चित्रित गरिएको छ। अर्किड सेशेल्सको राष्ट्रिय फूल भएकाले यो उपहार दुवै देशको जैविक विविधता संरक्षणप्रतिको साझा प्रतिबद्धताको प्रतीक मानिएको छ।

द्वितीय महिला लीना पिलेलाई तमिलनाडुको प्रसिद्ध काञ्चीपुरम रेशमी कपड़ा उपहार दिइएको छ। जीआई ट्याग प्राप्त यस रेशमी वस्त्रमा सुनौलो जरीको उत्कृष्ट काम, आकर्षक किनारा तथा परम्परागत कलात्मक डिजाइनहरू समावेश छन्। यसले काञ्चीपुरमको समृद्ध बुनाइ परम्परा र सांस्कृतिक सौन्दर्यलाई प्रतिबिम्बित गर्दछ।

सेशेल्सको राष्ट्रिय सभाका अध्यक्ष अजारेल एर्नेस्टालाई तमिलनाडुको निलगिरि क्षेत्रमा बसोबास गर्ने टोडा समुदायद्वारा हातैले बनाइएको टोडा कढाइयुक्त शाल उपहार प्रदान गरिएको छ। सेतो कपड़ामा रातो र कालो ज्यामितीय कढाइ गरिएको यो शाल भारतको आदिवासी सम्पदा र परम्परागत शिल्पकलाको प्रतीक हो। ‘पुखूर’ नामक विशेष कढाइ प्रविधिबाट तयार गरिने यस शालले पहिचान, सांस्कृतिक निरन्तरता तथा आदिवासी ज्ञानको संरक्षणलाई प्रतिनिधित्व गर्दछ।

यी सबै उपहारहरूले भारतको सांस्कृतिक विविधता, परम्परागत शिल्पकला तथा कारीगरहरूको अद्वितीय सिर्जनशीलतालाई विश्वसामु प्रस्तुत गर्नुका साथै भारत–सेशेल्स मित्रतालाई अझ् सुदृढ़ बनाउने सन्देश दिएका छन्।

हिन्दुस्थान समाचार / भवानी थामी