बेङ्गलुरु, ३० जून (हि.स.)। कर्नाटकका मुख्यमन्त्री डीके शिवकुमार ले राज्यभरि मङ्गलवारदेखि शुरु भएको मतदाता सूचीको विशेष सघन पुनरीक्षण (एसआईआर) अभियानमा सबै योग्य मतदातालाई सक्रिय रूपमा सहयोग गर्न अपील गरेका छन्। उनले मतदाता सूचीमा सही तथा अद्यावधिक विवरण दर्ता हुनु लोकतान्त्रिक व्यवस्थालाई सुदृढ़ बनाउन अत्यन्त आवश्यक रहेको बताए।

मुख्यमन्त्रीले सामाजिक सञ्जाल ‘एक्स’ मार्फत जानकारी दिँदै ३० जूनदेखि २९ जुलाईसम्म सञ्चालन हुने घर–घर सर्वेक्षण (एन्युमेरेशन) अभियान अन्तर्गत बेङ्गलुरुको सदाशिवनगर स्थित आफ्नै निवासमा परिवारका सदस्यहरूसँग मिलेर बुथस्तरीय अधिकारी (बीएलओ) लाई आवश्यक कागजात तथा जानकारी उपलब्ध गराई आफू पनि यस प्रक्रियामा सहभागी भएको बताए।

उनले राज्यका सबै नागरिक तथा योग्य मतदातालाई आफ्नो घरमा पुग्ने बीएलओलाई पूर्ण सहयोग गर्न तथा आवश्यक कागजात र सही विवरण उपलब्ध गराउन आग्रह गरे, जसले गर्दा मतदाता सूचीमा उनीहरूको विवरण त्रुटिरहित र अद्यावधिक रूपमा दर्ता गर्न मद्दत पुगोस्।

मुख्यमन्त्रीले लोकतन्त्र केवल शासन प्रणाली मात्र नभई प्रत्येक नागरिकको आवाज भएको उल्लेख गर्दै त्यो आवाजलाई प्रभावकारी बनाउने सबैभन्दा महत्वपूर्ण माध्यम मताधिकार भएको बताए। प्रत्येक मतले देशको भविष्यको दिशा निर्धारण गर्न तथा लोकतान्त्रिक व्यवस्थालाई सशक्त बनाउन महत्वपूर्ण भूमिका खेल्ने उनको भनाइ थियो।

उनले सबै योग्य मतदातालाई समयमै आवश्यक कागजात उपलब्ध गराई मतदाता सूचीको विशेष सघन पुनरीक्षण अभियानमा सक्रिय रूपमा सहभागी हुन तथा आफ्नो मताधिकार सुरक्षित र सुनिश्चित गर्न आग्रह गरे।

नागरिकहरूको सहयोगबाट यो अभियान सफल हुने र राज्यको मतदाता सूची अझ् सटीक, पारदर्शी तथा अद्यावधिक बन्ने विश्वास पनि उनले व्यक्त गरे।

हिन्दुस्थान समाचार / भवानी थामी