मंगलुरु, 0१ जुलाई (हि.स.)। कर्नाटकको दक्षिण कन्नड़ जिल्लामा लगातार परिरहेको मुसलधारे वर्षाबीच बुधवार बिहान सबेरै मंगलुरुको नागुरी क्षेत्रमा गएको भीषण पैह्रोमा बिहार मूलका एउटै परिवारका तीन सदस्यको मृत्यु भएको छ भने अन्य तीन जनालाई सकुशल उद्धार गरी अस्पतालमा भर्ती गरिएको छ। प्रशासनले उद्धार तथा राहत कार्य सम्पन्न गरी प्रभावित परिवारलाई आवश्यक सबै प्रकारको सहयोग उपलब्ध गराउने आश्वासन दिएको छ।
बुधवार बिहान नागुरी क्षेत्रमा एक घरमाथि अचानक पहाड़बाट ठूलो मात्रामा माटो र ढुंगामाटो खस्यो। मलबामुनि परिवारका सबै सदस्य पुरिए। घटनाको जानकारी प्राप्त हुनसाथ स्थानीय बासिन्दा, अग्निशमन तथा आपतकालीन सेवा विभाग, पुलिस र राज्य आपदा व्यवस्थापन बलका टोलीहरू घटनास्थलमा पुगे र युद्धस्तरमा उद्धार तथा राहत अभियान सञ्चालन गरे।
उद्धार टोलीले अथक प्रयासपछि बालकृष्ण (४८), अल्का (१४) र अनुषा (११) लाई मलबामुनिबाट सकुशल बाहिर निकाल्यो र तत्काल स्थानीय अस्पतालमा भर्ती गरिएको छ र उपचार जारी रहेको बताइएको छ। चिकित्सकहरू अनुसार, घाइतेहरूको अवस्थामाथि निरन्तर निगरानी राखिएको छ।
तर शान्ता (४६), अनामिका चौरसिया (८) र परी (४) लाई भने बचाउन सकिएन। मलबामुनि पुरिँदा उनीहरूको घटनास्थलमै मृत्यु भएको थियो।
घटनाको जानकारी पाएपछि दक्षिण कन्नड़का उपायुक्त वरिष्ठ अधिकारीहरू सहित घटनास्थलमा पुगे र उद्धार तथा राहत कार्यको निरीक्षण गरे। उनले सम्बन्धित अधिकारीहरूलाई घाइतेहरूको उचित उपचार सुनिश्चित गर्न, प्रभावित परिवारलाई आवश्यक आर्थिक तथा प्रशासनिक सहायता उपलब्ध गराउन तथा क्षेत्रको अवस्थामाथि निरन्तर निगरानी राख्न निर्देश दिएका छन्।
उपायुक्त अनुसार मृतक र घाइतेहरू मूलतः बिहारका बासिन्दा हुन्। उक्त परिवार विगत लगभग २० वर्षदेखि मंगलुरुको कंकनाडी गाउँमा, कंकनाडी पुलिस थाना पछाड़ीको क्षेत्रमा बसोबास गर्दै आएको थियो। लगातार परिरहेको भारी वर्षाका कारण पहाड़को माटो खस्दा यो दुर्घटना भएको हो।
यसैबीच दक्षिण कन्नड जिल्लाका प्रभारी मन्त्री , जो दिल्ली भ्रमणमा थिए, घटनाको जानकारी पाए लगत्तै आफ्नो कार्यक्रम बीचमै स्थगित गरी मंगलुरु फर्कने निर्णय गरेका छन्। उनले टेलिफोन मार्फत उपायुक्तसँग कुरा गर्दै घाइतेहरूलाई उत्कृष्ट चिकित्सा सुविधा उपलब्ध गराउन, उद्धार तथा राहत कार्यमा कुनै कमी हुन नदिन तथा प्रभावित परिवारलाई आवश्यक सबै सरकारी सहायता उपलब्ध गराउन निर्देश दिएका छन्।
उल्लेखनीय छ कि दक्षिण कन्नड जिल्लामा पछिल्ला केही दिनयता निरन्तर भारी वर्षा भइरहेको छ। यसका कारण विभिन्न स्थानमा जलमग्नता, पैह्रो तथा जनजीवन प्रभावित हुने घटनाहरू देखिएका छन्। प्रशासनले सर्वसाधारणलाई संवेदनशील तथा पहिरोको जोखिम भएका क्षेत्रहरूबाट टाढ़ा रहन तथा मौसम विभागका सुझावहरू पालना गर्न आग्रह गरेको छ।
हिन्दुस्थान समाचार / भवानी थामी
05 Jul 2026
