अकल्याण्ड, 11 जुलाई (हि.स.)। प्रधानमन्त्री नरेन्द्र मोदीले शनिबार भारत केवल ठूलो बजार मात्र नभई विश्वव्यापी विकासको ‘लञ्चप्याड’ बनिसकेको बताएका छन्। उनले न्युजिल्यान्डका उद्योगी-व्यवसायीहरूलाई भारतको विकास यात्रामा साझेदार बन्न आह्वान गर्दै भारत-न्युजिल्यान्डबीच सम्पन्न मुक्त व्यापार सम्झौता (एफटीए) ले व्यापार, लगानी, प्रविधि, सेवा तथा प्रतिभा आदान-प्रदानका नयाँ अवसरहरू सिर्जना गर्ने बताएका हुन्।

अकल्याण्डमा न्युजिल्यान्डका प्रधानमन्त्री क्रिस्टोफर लक्सनसँग दुवै देशका प्रमुख उद्योगपति तथा प्रमुख कार्यकारी अधिकृत (सीईओ) हरूलाई सम्बोधन गर्दै प्रधानमन्त्री मोदीले भारत र न्युजिल्यान्ड साझा लोकतान्त्रिक मूल्य, कानुनी शासन, विविधता तथा दिगो विकासप्रतिको प्रतिबद्धताले जोडिएका राष्ट्र भएको बताए। यही आधारले दुवै देशबीचको आर्थिक साझेदारीलाई नयाँ उचाइमा पुर्याउने उनको भनाइ थियो।

उनले दुवै देशले केवल नौ महिनाको रेकर्ड समयमै मुक्त व्यापार सम्झौता सम्पन्न गरेको उल्लेख गर्दै यसलाई द्विपक्षीय सम्बन्धको ऐतिहासिक उपलब्धि बताए। साथै, सन् २०३० सम्म द्विपक्षीय व्यापारलाई दोब्बर वृद्धि गरी ७ अरब न्युजिल्यान्ड डलर (करिब ३५ हजार करोड़ भारतीय रुपियाँ) पुर्याउने लक्ष्य पूरा हुने विश्वास व्यक्त गरे।

प्रधानमन्त्री मोदीले न्युजिल्यान्डले आगामी १५ वर्षमा भारतमा २० अरब अमेरिकी डलर लगानी गर्ने प्रतिबद्धता जनाएको जानकारी दिँदै यो केवल लगानी मात्र नभई भारतको विकास यात्रामा सहयात्री बन्ने संकल्प पनि भएको बताए।

उनले भारत विश्वकै सबैभन्दा तीव्र गतिमा वृद्धि भइरहेको प्रमुख अर्थतन्त्र भएको उल्लेख गर्दै तीव्र रूपमा विस्तार भइरहेको मध्यम वर्ग, डिजिटल क्रान्ति, आधुनिक पूर्वाधार, दक्ष युवा जनशक्ति तथा निरन्तर आर्थिक सुधारले लगानीकर्ताका लागि अभूतपूर्व अवसर सिर्जना गरेको बताए। नीति स्थिरता, राजनीतिक स्थायित्व र निरन्तर विकासका कारण भारत विश्व आर्थिक वृद्धिको महत्वपूर्ण इन्जिन बनेको उनको भनाइ थियो।

मोदीले भने, विश्वका लागि हाम्रो सन्देश स्पष्ट छ- भारत केवल एउटा बजार होइन, विश्वव्यापी विकासको लञ्चप्याड हो।

उनले उद्योगी-व्यवसायीहरूलाई उत्पादनमा आधारित प्रोत्साहन (पीएलआई) योजनाको लाभ लिन आग्रह गर्दै खाद्य प्रशोधनदेखि वस्त्र उद्योगसम्मका १४ क्षेत्रमा करिब २० अरब अमेरिकी डलर बराबरको प्रोत्साहन उपलब्ध गराइँदै आएको बताए। साथै, न्युजिल्यान्डका कम्पनीहरूलाई भारतको उत्पादन क्षेत्रमा साझेदार बन्न आह्वान गरे।

प्रधानमन्त्रीले भारतमा विमानस्थल, क्षेत्रीय हवाई सम्पर्क, हवाई कार्गो तथा पर्यटन तीव्र रूपमा विस्तार भइरहेको र भारत विश्वको तेस्रो ठूलो घरेलु हवाई बजार बनिसकेको बताए। उनले दुवै देशबीच कार्गो करिडोर, हवाई सम्पर्क तथा संयुक्त पर्यटन प्याकेज विकास गर्न सुझाउ दिए।

उनले भारत फिनटेक क्षेत्रमा विश्वकै अग्रणी मुलुक रहेको उल्लेख गर्दै विश्वभर हुने रियल-टाइम डिजिटल भुक्तानीमध्ये करिब ५० प्रतिशत भारतमै हुने जानकारी दिए। साथै, अन्तरिक्ष क्षेत्र निजी सहभागिताका लागि खुला गरिएपछि भारतमा ४०० भन्दा बढी स्पेस स्टार्टअप सञ्चालनमा रहेको, जसमा एक युनिकर्न कम्पनी पनि समावेश रहेको बताए।

प्रधानमन्त्री मोदीले मुक्त व्यापार सम्झौतामा माओरी समुदायका व्यवसायहरूलाई पनि विशेष प्राथमिकता दिइएको उल्लेख गर्दै भारत र न्युजिल्यान्डले साझा मूल्यका आधारमा समावेशी तथा दिगो व्यापारको नयाँ नमुना विकास गर्न सक्ने बताए।

उनले दुवै देशका उद्योगी-व्यवसायीलाई महत्वाकांक्षी व्यापारिक रोडम्याप तयार गर्न आग्रह गर्दै आ-आफ्ना क्षमतालाई जोडेर कम्तीमा पाँच प्रमुख संयुक्त परियोजना पहिचान गर्न तथा तिनको समयबद्ध कार्यान्वयन सुनिश्चित गर्न प्रभावकारी समीक्षा संयन्त्र विकास गर्नुपर्ने बताए। यसबाट भारत-न्युजिल्यान्ड आर्थिक साझेदारीको वास्तविक सम्भावनाको पूर्ण उपयोग गर्न सकिने उनको भनाइ थियो।

---------------

हिन्दुस्थान समाचार / भवानी थामी