- हालसम्म दुई लाखभन्दा बढी श्रद्धालुले बाबा बर्फानीको दर्शन गरिसके

जम्मू, 11 जुलाई (हि.स.)। श्री अमरनाथ यात्राअन्तर्गत शनिबार २,४३५ महिला सहित कुल ९,१८२ जना श्रद्धालुको १०औँ टोली जम्मूको भगवती नगर यात्री निवास आधार शिविरबाट पवित्र अमरनाथ गुफा मन्दिरतर्फ प्रस्थान गरेको छ। श्रद्धालुहरूलाई कडा सुरक्षा व्यवस्थाबीच छुट्टाछुट्टै सवारी काफिलामार्फत दक्षिण कश्मीरको अनन्तनाग जिल्लास्थित पहलगाम तथा गान्दरबल जिल्लाको बालटाल आधार शिविरतर्फ पठाइएको हो।

अधिकारीहरूका अनुसार, प्रस्थान गर्ने श्रद्धालुहरूमध्ये २५६ जना साधु, ४६ जना साध्वी तथा ३१ जना बालबालिका पनि रहेका छन्। श्रद्धालुहरूको सुरक्षाका लागि जम्मूदेखि दुवै यात्रा मार्गसम्म बहुस्तरीय सुरक्षा व्यवस्था गरिएको छ। केन्द्रिय अर्धसैनिक बल, जम्मू-कश्मीर पुलिस तथा अन्य सुरक्षा निकायको निगरानीमा सवारी काफिलालाई निर्धारित समयमै गन्तव्यतर्फ पठाइयो।

अधिकारीहरूका अनुसार, २०६ वटा सवारी साधनमार्फत ५,८७७ जना श्रद्धालुलाई परम्परागत पहलगाम मार्ग हुँदै पठाइएको छ। यो मार्ग अनन्तनाग जिल्लाको नुनवान आधार शिविर हुँदै पवित्र गुफासम्म पुग्छ। दूरीका हिसाबले लामो भए पनि प्राकृतिक सौन्दर्यका कारण यो मार्ग विशेष आकर्षक मानिन्छ।

त्यसैगरी, १२७ वटा सवारी साधनमा सवार ३,३०५ जना श्रद्धालुले बालटाल मार्ग रोजेका छन्। दूरी कम भएकाले यो मार्गबाट कम समयमा पवित्र गुफासम्म पुग्न सकिन्छ।

प्रशासनले यात्रा मार्गमा श्रद्धालुहरूको सुविधाका लागि स्वास्थ्य सेवा, खानेपानी, विद्युत्, सञ्चार, भोजन, आवास तथा विपद् व्यवस्थापनलगायतका आवश्यक व्यवस्था मिलाएको जनाएको छ। यात्रा सहज र सुरक्षित बनाउन मौसम तथा सुरक्षा अवस्थामाथि निरन्तर निगरानी राखिएको छ।

समुद्री सतहबाट करिब ३,८८० मिटर उचाइमा रहेको पवित्र अमरनाथ गुफाको ५७ दिने वार्षिक यात्रा गत ३ जुलाईदेखि पहलगाम र बालटाल दुवै मार्गबाट शुरु भएको थियो। यो यात्रा रक्षाबन्धनका अवसरमा २८ अगस्तमा सम्पन्न हुनेछ।

यस वर्ष धार्मिक आस्था र उत्साहका कारण यात्राप्रति श्रद्धालुहरूको विशेष आकर्षण देखिएको छ। हालसम्म देश-विदेशबाट आएका दुई लाखभन्दा बढी श्रद्धालुले बाबा बर्फानीको दर्शन गरिसकेका छन्। आगामी दिनमा श्रद्धालुको संख्या अझ बढ्ने अपेक्षा गर्दै प्रशासनले सबै आवश्यक व्यवस्थालाई थप सुदृढ बनाइरहेको जनाएको छ।

---------------

हिन्दुस्थान समाचार / भवानी थामी