इम्फाल, 11 जुलाई (हि.स.)। मणिपुरमा सुरक्षा बलले पछिल्लो २४ घण्टामा सञ्चालन गरेका छुट्टाछुट्टै अभियानमा उल्लेखनीय सफलता हासिल गरेका छन्। कारबाहीका क्रममा प्रतिबन्धित उग्रवादी संगठनका एक सक्रिय क्याडर पक्राउ परेका छन् भने हेरोइन र चोरी भएको मोटरसाइकल पनि बरामद गरिएको छ।

आधिकारिक जानकारीअनुसार, शनिबार थौबल जिल्लाको थौबल पुलिस थाना अन्तर्गत लाम्बोइथोङ नजिकको वाङ्बल क्षेत्रबाट प्रतिबन्धित संगठन आरपीएफ/पीएलए का सक्रिय क्याडर शैखोम सुनील सिंह उर्फ इबोहाल (४५) लाई पक्राउ गरिएको हो। कारबाहीका क्रममा एउटा अल्टो कार पनि नियन्त्रणमा लिइएको छ।

अर्को अभियानमा मिजोरमको आइजोलस्थित बाउनकन पुलिस थानाबाट प्राप्त सूचनाका आधारमा मणिपुर पुलिसले चुराचाँदपुर जिल्लाबाट चोरी भएको एउटा मोटरसाइकल बरामद गरेको छ। उक्त मोटरसाइकल चोरीपछि मणिपुर ल्याइएको सूचना प्राप्त भएको थियो।

यसैबीच, सुरक्षा बलले बिष्णुपुर जिल्लाको मोइराङ पुलिस थाना अन्तर्गत गेलमोल लामखाई क्षेत्रमा एमएन-०१एएम-१०२६ नम्बरको अटो-रिक्सालाई रोकेर खानतलासी गर्दा करिब ६८ ग्राम शंकास्पद हेरोइन पाउडर बरामद गरेको छ। घटनामा तीन जनालाई पक्राउ गरिएको छ।

पक्राउ पर्नेहरूमा थौबल जिल्लाकी एबेम (३९), इम्फाल पश्चिम जिल्लाका हुसैन (२०) तथा थौबल जिल्लाका मोहम्मद नसीमुल्ला (४०) रहेका छन्। घटनाबारे मुद्दा दर्ता गरी थप कानुनी प्रक्रिया अघि बढाइएको पुलिसले जनाएको छ।

---------------

हिन्दुस्थान समाचार / भवानी थामी