गान्तोक, 11 जुलाई (हि.स.)। पश्चिम बंगालकी मुख्यमन्त्रीविरुद्ध सामाजिक सञ्जालमा कथित रूपमा आपत्तिजनक सामग्री साझा गरेको आरोपमा कोलकाता पुलिसका दुई जना पुलिस उपायुक्त (डीसी) स्तरका अधिकारीलाई निलम्बन गरिएको छ।

लालबजार स्रोतका अनुसार, उपायुक्त (नर्थ-३) विधान साहा र उपायुक्त (पोर्ट–२) पार्थ प्रतिम दास विरुद्ध यो कारबाही गरिएको हो। आरोपअनुसार, दुवै अधिकारीले आफ्नो सामाजिक सञ्जाल खातामार्फत मुख्यमन्त्री तथा राज्य सरकारसँग सम्बन्धित विवादास्पद र कथित रूपमा आपत्तिजनक सामग्री साझा गरेका थिए।

स्रोतका अनुसार, पार्थ प्रतिम दासले राज्य सरकार र मुख्यमन्त्रीको विरोधमा एउटा विवादास्पद भिडियो पोस्ट गरेका थिए। त्यसैगरी, विधान साहामाथि पनि यस्तै प्रकृतिको सामग्री साझा गरेको आरोप लागेको छ।

यसअघि कोलकाता पुलिस आयुक्तले सबै पुलिस अधिकारीलाई सामाजिक सञ्जालको प्रयोगमा विशेष सावधानी अपनाउन निर्देशन दिएका थिए। परामर्शमा प्रशासनसँग सम्बन्धित कुनै पनि भ्रामक वा अनुपयुक्त सन्देशले समाजमा नकारात्मक प्रभाव पार्न सक्ने उल्लेख गरिएको थियो।

यस घटनामा प्रारम्भिक जाँचपछि दुवै अधिकारीलाई तत्काल प्रभावबाट निलम्बन गरिएको छ। घटनाबारे विभागीय जाँच जारी रहेको र अनुसन्धानको निष्कर्षका आधारमा थप कारबाही गरिने बताइएको छ।

---------------

हिन्दुस्थान समाचार / भवानी थामी