बालोतरा, 13 जुलाई (हि.स.)। राजस्थानको बाडमेर-जोधपुर राष्ट्रिय राजमार्गअन्तर्गत पचपदरा थाना क्षेत्रमा आइतबार राति भएको सवारी दुर्घटनामा पाँच युवाको मृत्यु भएको छ भने अन्य तीन जना गम्भीर घाइते भएका छन्। तीव्र गतिमा रहेको स्कर्पियो अगाडि गुडिरहेको डम्परसँग ठोक्किँदा दुर्घटना भएको हो। ठक्कर यति भीषण थियो कि स्कर्पियो पूर्ण रूपमा क्षतिग्रस्त भयो र त्यसमा सवार व्यक्तिहरू गाडीभित्रै च्यापिए।

पुलिसका अनुसार, दुर्घटना भाडिंयावास गाउँ नजिकै भएको हो। घटनाको जानकारी प्राप्त हुनासाथ पुलिस घटनास्थल पुगेको थियो। स्थानीयवासीको सहयोगमा घाइतेहरूलाई उद्धार गरी बालोतरास्थित सरकारी नाहटा अस्पताल पुर्याइएको थियो। त्यहाँ चिकित्सकहरूले रेवन्ताराम (२६), स्वरूपाराम (२७) र भरत (२५) लाई मृत घोषणा गरेका थिए।

गम्भीर घाइते किशन, भावेश, बाबू, मुकेश र हेमारामलाई प्राथमिक उपचारपछि जोधपुर रेफर गरिएको थियो। उपचारका क्रममा किशन (२७) र भावेशको पनि मृत्यु भएको छ।

हेड कन्स्टेबल डुंगाराम खोथका अनुसार, सबै युवक जोधपुरस्थित भोमियाजी मन्दिरमा दर्शन गरेर आफ्नै गाउँ फर्किरहेका बेला यो दुर्घटना भएको हो। दुर्घटनामा तीन जनाको घटनास्थलमै मृत्यु भएको थियो भने पाँच जना घाइते भएका थिए, जसलाई थप उपचारका लागि जोधपुर पठाइएको थियो।

दुर्घटनाको खबर फैलिनासाथ सरकारी नाहटा अस्पतालमा मृतकका आफन्त र गाउँलेहरूको ठूलो भीड जम्मा भएको थियो। घाइते बाबू, मुकेश र हेमारामको जोधपुरमा उपचार भइरहेको छ।

---------------

हिन्दुस्थान समाचार / भवानी थामी