नयाँ दिल्ली, 15 जुलाई (हि.स.)। प्रधानमन्त्री नरेन्द्र मोदीले भारत र ब्रिटेनबीचको व्यापक आर्थिक तथा व्यापार सम्झौता (सीईटीए) र सामाजिक सुरक्षा सम्झौता लागू भएकोमा स्वागत गर्दै यसलाई दुई देशबीचको रणनीतिक साझेदारीमा कोसेढुङ्गा बताएका छन्। उनले भने कि यी सम्झौताहरूले दुई देशबीचको आर्थिक सम्बन्धलाई अझ् गहिरो बनाउनेछन् र किसान, उद्यमी, सूक्ष्म, लघू तथा मध्यम उद्यम (MSME) र दक्ष भारतीय पेशेवरहरूका लागि नयाँ अवसरहरू खोल्नेछन्।
केन्द्रिय वाणिज्य एवं उद्योग मन्त्री पियुष गोयलको एक्स पोस्टमा प्रतिक्रिया दिँदै प्रधानमन्त्री मोदीले भनेका छन्, यो भारत-ब्रिटेन साझेदारीको लागि महत्त्वपूर्ण क्षण हो। उनले भने, व्यापक आर्थिक तथा व्यापार सम्झौता (सीईटीए) र सामाजिक सुरक्षा सम्झौता लागू हँदा दुवै देशको साझा महत्वाकांक्षालाई ठोस अवसरहरूमा रूपान्तरण गर्नेछ।
प्रधानमन्त्रीले भने, सीईटीएले भारतीय किसान, उद्यमी र एमएसएमई क्षेत्रलाई नयाँ गति प्रदान गर्नेछ। यसले धेरै प्रमुख भारतीय उद्योगहरूलाई ब्रिटेनको बजारमा बलियो पहुँच प्रदान गर्नेछ। यसका साथै प्रविधि, व्यावसायिक सेवा र नवाचारको क्षेत्रमा सहयोग बढ्नेछ र दक्ष भारतीय प्रतिभाको आवागमनलाई प्रोत्साहित गरिनेछ।
उनले सामाजिक सुरक्षा सम्झौताले ब्रिटेनमा अस्थायी रूपमा काम गरिरहेका भारतीय पेशेवरहरूलाई उल्लेखनीय राहत प्रदान गर्ने र भारतीय उद्यमहरूको विश्वव्यापी प्रतिस्पर्धात्मकतालाई बलियो बनाउने बताए। प्रधानमन्त्रीले यो उपलब्धि दुई लोकतान्त्रिक देशहरूबीचको पारस्परिक विश्वास र व्यापार, प्रविधि, लगानी र नवाचारमा आधारित भविष्यको साझेदारीप्रतिको उनीहरूको प्रतिबद्धताको प्रतीक भएको बताए। उनले भारत र ब्रिटेनले साझा समृद्धितर्फ सँगै काम गर्न जारी राख्ने विश्वास व्यक्त गरे।
यसअघि केन्द्रिय वाणिज्य एवं उद्योग मन्त्री पियुष गोयलले आज भारत-ब्रिटेन सम्बन्धमा ऐतिहासिक कोशेढुङ्गा भएको बताए। उनले प्रधानमन्त्री नरेन्द्र मोदीको नेतृत्वमा भारत-ब्रिटेन व्यापक आर्थिक तथा व्यापार सम्झौता (सीईटीए) र सामाजिक सुरक्षा सम्झौता लागू भएको उल्लेख गरे। यी सम्झौताहरू अन्तर्गत भारतका लगभग 99% निर्यात उत्पादनहरूले शून्य भन्सार शुल्कमा ब्रिटेनका बजारमा पहुँच प्राप्त गर्नेछन्, जसले व्यापार मूल्यको लगभग 100% समेट्छ।
गोयलले भने कि यो सम्झौताले कपड़ा, छाला, रत्न तथा आभूषण, इन्जिनियरिङ उत्पादन, समुद्री उत्पादन, रसायन, प्रशोधित खाद्य, एमएसएमई, किसान र उत्पादन क्षेत्रका लागि अभूतपूर्व अवसरहरू प्रदान गर्नेछ। यसले सूचना प्रविधि, व्यावसायिक सेवा, वित्तीय सेवा, शिक्षा र व्यावसायिक सेवाहरूमा पनि नयाँ अवसरहरू सिर्जना गर्नेछ र भारतीय प्रतिभाको विश्वव्यापी गतिशीलता बढ़ाउनेछ।
उनले भने कि सामाजिक सुरक्षा सम्झौता अन्तर्गत अस्थायी कार्यभारमा ब्रिटेन जाने भारतीय पेशेवरहरूलाई पाँच वर्षको लागि दोहोरो सामाजिक सुरक्षा योगदानबाट छुट दिइनेछ, जसले भारतीय कार्यबलको विश्वव्यापी प्रतिस्पर्धात्मकतालाई अझ् बलियो बनाउनेछ।
गोयलले आफ्ना ब्रिटेनका समकक्ष पिटर काइल र दुवै देशका वार्ता टोलीहरूलाई सम्झौतालाई सफलतापूर्वक अन्तिम रूप दिएकोमा धन्यवाद दिए र भारत र ब्रिटेन बलियो, नवाचार-आधारित साझेदारी मार्फत दीर्घकालीन वृद्धि, लगानी र साझा समृद्धिलाई अगाड़ी बढ़ाउन प्रतिबद्ध रहेको बताए।
हिन्दुस्थान समाचार / भवानी थामी
