नयाँ दिल्ली, १५ जुलाई (हि.स.)। भारतको उच्चतम अदालतमा सुनुवाईका क्रममा होहल्ला गरेको आरोपमा दिल्ली पुलिसले उत्तर प्रदेशका दुई जना कानुनका विद्यार्थीलाई पक्राउ गरेको छ। उनीहरूमाथि अदालतको कार्यवाही अवरुद्ध गरेको, अभद्र भाषा प्रयोग गरेको, कागजात तथा पर्चा फ्याँकेको र रोक्न खोज्ने सुरक्षा कर्मचारीसँग धक्का-मुक्की गरेको आरोप लागेको छ।

नयाँ दिल्ली जिल्लाको तिलक मार्ग पुलिस थानाले मुद्दा दर्ता गरी दुवै आरोपीलाई पक्राउ गरेको हो। अदालतले दुई दिनको पुलिस रिमाण्ड स्वीकृत गरेपछि घटनाबारे विस्तृत अनुसन्धान भइरहेको पुलिसले जनाएको छ।

पुलिसका अनुसार, घटना 10 जुलाईमा उच्चतम अदालतको कोर्ट नम्बर १३ मा भएको थियो। त्यहाँ एसएलपी नम्बर ३१३६७/२०२६ को सुनुवाई भइरहेको बेला २४ वर्षीय प्रबल प्रताप सिंह स्वयं निवेदकका रूपमा अदालतमा उपस्थित भएका थिए। उनी लखनउ विश्वविद्यालयमा एलएलबी तृतीय वर्षका विद्यार्थी हुन्। उनीसँगै २३ वर्षीय चन्दर भान पनि उपस्थित थिए, जो सोही विश्वविद्यालयमा एलएलबी द्वितीय वर्षमा अध्ययनरत छन्। उनीहरू क्रमशः इटावा र रायबरेलीका निवासी हुन्।

अनुसन्धानका क्रममा सुनुवाई भइरहेका बेला प्रबल प्रताप सिंहले अचानक अदालतभित्र अभद्र तथा असंसदीय भाषा प्रयोग गर्न थालेका थिए। त्यसपछि उनले अदालत कक्षभित्र कागजात र पर्चाहरू फ्याँकेका कारण केही समयका लागि सुनुवाई प्रभावित भएको थियो।

अदालतको व्यवस्था कायम गर्न उच्चतम अदालतका सुरक्षा कर्मचारी अगाडि बढ्दा आरोपीले एक सुरक्षा कर्मचारीसँग धक्का-मुक्की गरेको पुलिसको आरोप छ। त्यसपछि सुरक्षा कर्मचारीको उजुरीका आधारमा तिलक मार्ग पुलिस थानामा भारतीय न्याय संहिता (बीएनएस) अन्तर्गत विभिन्न धारामा प्राथमिकी दर्ता गरिएको थियो।

पुलिसका अनुसार, उच्चतम अदालतको निर्देशनपछि दुवै आरोपीको आईएचबीएएसमा स्वास्थ्य परीक्षण गरिएको थियो। चिकित्सकीय प्रतिवेदनमा उनीहरूलाई तत्काल कुनै मानसिक उपचार आवश्यक नरहेको उल्लेख गरिएको छ।

---------------

हिन्दुस्थान समाचार / भवानी थामी