वासिङ्टन, १६ जुलाई (हि.स.)। अमेरिकी राष्ट्रपति डोनाल्ड ट्रम्पले बुधबार इरानले दिसम्बर २०२४ देखि हिरासतमा राखेकी एक अमेरिकी महिलालाई रिहा गरेको जानकारी दिएका छन्। ट्रम्पले आफ्नो सामाजिक सञ्जाल प्लेटफर्म ट्रुथ सोसलमा ती महिलाको नाम सार्वजनिक गरेका थिएनन्, तर पछि उनका वकिलले उनको पहिचान डीना करारीका रूपमा गरेका छन्।

ट्रम्पले ट्रुथ सोसलमा लेखेका छन्, 'इरानले अमेरिकी नागरिकलाई देश छोड्न अनुमति दिएको छ। उनलाई तत्कालीन राष्ट्रपति जो बाइडेनको कार्यकालमा दिसम्बर २०२४ मा गलत रूपमा हिरासतमा लिइएको थियो।' उनी अहिले सुरक्षित रूपमा इरानबाट बाहिरिएको बताउँदै उनले इरानको यस सद्भावपूर्ण कदमको प्रशंसा गरेका छन्।

सीएनएनका अनुसार, ट्रम्पको पोस्टपछि ह्वाइट हाउस र राष्ट्रपतिको बन्धक मामिलासम्बन्धी विशेष दूतको कार्यालयसँग सम्पर्क गरिएको थियो। त्यसपछि अन्तरराष्ट्रिय मानवअधिकार वकिल जेरेड गेन्सरले सामाजिक सञ्जाल एक्समार्फत डीना करारी रिहा भएको पुष्टि गरेका छन्।

गेन्सरले डीना करारी दिसम्बर २०२४ देखि झुटा आरोपका कारण इरानमा फसेकी थिइन् भनेर बताएका छन्। उनले राष्ट्रपति ट्रम्पप्रति आभार व्यक्त गर्दै डीना सुरक्षित रहेको र संयुक्त राज्य अमेरिका फर्किरहेको जानकारी दिएका छन्।

एक अमेरिकी अधिकारीका अनुसार, गत महिनासम्म अमेरिकी सरकारले इरानमा हिरासतमा रहेका कम्तीमा छ जना अमेरिकी नागरिकको अवस्थामाथि निगरानी गरिरहेको थियो। तीमध्ये दुई जनालाई गलत रूपमा हिरासतमा राखिएका अमेरिकी नागरिकका रूपमा वर्गीकृत गरेको थियो।

हिन्दुस्थान समाचार / बिशाल