नयाँ दिल्ली, 17 जुलाई (हि.स.)। राष्ट्रपति द्रौपदी मुर्मुले 19 जुलाईदेखि 25 जुलाईसम्म मोल्डोवा, उत्तरी म्यासेडोनिया र रोमानियाको राजकीय भ्रमण गर्नेछिन्। यस भ्रमणको क्रममा उनले तीन देशका शीर्ष नेतृत्वसँग द्विपक्षीय वार्ता गर्नेछिन् र विभिन्न क्षेत्रमा व्यापार, लगानी र सहयोग बढ़ाउनबारे छलफल गर्नेछिन्।
विदेश मन्त्रालयले शुक्रवार जानकारी गराएको छ कि राष्ट्रपति मुर्मु राष्ट्रपति मैया सैन्डुको निमन्त्रणामा 20 जुलाईमा मोल्डोवा जानेछिन्। यो भारतीय राष्ट्रपतिको मोल्डोवाको पहिलो भ्रमण हुनेछ। भ्रमणको क्रममा राष्ट्रपतिले आफ्ना समकक्षी मैया सैन्डुसँग प्रतिनिधिमण्डलस्तरीय वार्ता गर्नेछिन्। उनले मोल्डोवा संसदका अध्यक्ष इगोर ग्रोसुसँग पनि भेट गर्नेछिन्। उनले मोल्डोवा-भारत संसदीय मैत्री समूहका सदस्यहरूसँग पनि अन्तरक्रिया गर्नेछिन्। उनले भारत-मोल्डोवा व्यापार मञ्चलाई पनि सम्बोधन गर्नेछिन् र भारतीय समुदायका सदस्यहरूलाई भेट्नेछिन्।
मन्त्रालय अनुसार, भारत र मोल्डोवाबीच मैत्रीपूर्ण सम्बन्ध छ। यो भ्रमण दुई देशबीचको सम्बन्धलाई व्यापक साझेदारीमा उकास्ने दिशामा ऐतिहासिक कदम हुनेछ। कृषि, स्वास्थ्य र औषधि, सूचना प्रविधि र शिक्षा जस्ता क्षेत्रमा सहयोगको विशाल सम्भावना छ।
राष्ट्रपति मुर्मुले राष्ट्रपति गोर्डाना सिल्जानोभ्स्का-दाभकोभाको निमन्त्रणामा जुलाई 21 र 22 मा उत्तरी म्यासेडोनियाको राजकीय भ्रमण गर्नेछिन्। यो उत्तरी म्यासेडोनियाको भारतीय राष्ट्रपतिको पहिलो भ्रमण पनि हुनेछ। यस भ्रमणको क्रममा उनले राष्ट्रपति गोर्डाना सिल्जानोभ्स्का-दाभकोभा, प्रधानमन्त्री क्रिस्टिजान मिकोस्की र असेम्बलीका अध्यक्षसँग भेट गर्नेछिन् र उत्तरी म्यासेडोनियाको सभालाई सम्बोधन गर्नेछिन्। उनी भारत-उत्तर म्यासेडोनिया व्यापार मञ्चमा पनि भाग लिनेछिन्। कृषि, औषधि, विज्ञान र प्रविधि, सूचना प्रविधि र आईटीईएस जस्ता प्राथमिकता क्षेत्रहरूमा आर्थिक सहयोग बढ़ाउन दुवै देशको विशेष रुचि छ।
यसपछि राष्ट्रपति मुर्मुले राष्ट्रपति निकुशोर डैनको निमन्त्रणामा 23 जुलाईदेखि 25 सम्म रोमानियाको राजकीय भ्रमण गर्नेछिन्। तीन दशकभन्दा बढ़ी समयपछि भारतीय राष्ट्रपतिको रोमानियाको यो पहिलो भ्रमण हुनेछ। आफ्नो भ्रमणको क्रममा उनले राष्ट्रपति निकुशौर डैन, अन्तरिम प्रधानमन्त्री इली बोलोजान, सिनेटका अध्यक्ष मिर्सिया अब्रुडियन, चेम्बर अफ डेपुटीजका अध्यक्ष सोरिन ग्रिन्डोआनु र रोमानिया-भारत संसदीय मैत्री समूहका सदस्यहरूलाई भेट्नेछिन्। उनले भारत-रोमानिया व्यापार मञ्चलाई पनि सम्बोधन गर्नेछिन् र भारतीय समुदायका सदस्यहरूसँग अन्तरक्रिया गर्नेछिन्।
विदेश मन्त्रालयले भनेको छ कि रोमानिया युरोपेली संघभित्र भारतको एक महत्त्वपूर्ण साझेदार हो र भारत-ईयू मुक्त व्यापार सम्झौताको समाप्तिले दुई देशहरू बीचको आर्थिक सम्बन्धलाई अझ् बलियो बनाउने अपेक्षा गरिएको छ।
मन्त्रालय अनुसार, यी तीन देशहरूमा राष्ट्रपतिको राज्य भ्रमणले पूर्वी युरोपेली क्षेत्रसँग भारतको बढ्दो संलग्नता र यी देशहरूसँग द्विपक्षीय सम्बन्धलाई अझ् बलियो बनाउने भारतको प्रतिबद्धतालाई प्रतिबिम्बित गर्दछ।
हिन्दुस्थान समाचार / भवानी थामी
