जम्मू, 03 जुलाई (हि.स.)। वार्षिक श्री अमरनाथ तीर्थयात्रा शुक्रबारदेखि औपचारिक रूपमा शुरु भएको छ। श्रद्धालुहरूको पहिलो जत्था बालटाल र नुनवान (पहलगाम) आधार शिविरबाट दक्षिण कश्मीर हिमालयस्थित पवित्र गुफा मन्दिरतर्फ प्रस्थान गरेको छ भने कडा सुरक्षा व्यवस्थाबीच ३,८६५ श्रद्धालुहरूको दोस्रो जत्था जम्मूबाट कश्मीरतर्फ रवाना भएको छ।
अधिकारीहरूका अनुसार, बीचबीचमा वर्षा भइरहे पनि परम्परागत ४८ किलोमिटर लामो नुनवान-पहलगाम मार्ग र १४ किलोमिटर लामो बालटाल मार्गबाट शुक्रबार बिहानै तीर्थयात्रा शुरु गरियो।
पुरुष, महिला तथा साधु-सन्तसहितका श्रद्धालुहरूलाई सम्बन्धित जिल्लाका उपायुक्त र वरिष्ठ पुलिस अधीक्षकले हरियो झण्डा देखाएर यात्रा शुभारम्भ गराएपछि बम बम भोले को जयघोष गर्दै ३,८८० मिटर उचाइमा रहेको पवित्र गुफा मन्दिरतर्फ प्रस्थान गरेका छन्।
यसैबीच, श्रद्धालुहरूको दोस्रो जत्था जम्मूस्थित भगवती नगर यात्री निवासबाट कडा सुरक्षा घेराबीच दुईवटा काफिलामा कश्मीरतर्फ रवाना भएको छ। आधिकारिक विवरणअनुसार, बालटाल मार्गका लागि १,७३५ श्रद्धालु बिहान ३:१३ बजी प्रस्थान गरे भने पहलगाम मार्गका लागि २,१३० श्रद्धालु बिहान ३:३८ बजी प्रस्थान भए। यससँगै दोस्रो जत्थामा कुल ३,८६५ श्रद्धालु सहभागी भएका छन्।
अधिकारीहरूका अनुसार, यस जत्थामा २,९६५ पुरुष, ६१८ महिला, २३० साधु, ४८ साध्वी तथा चार बालबालिका रहेका छन्। उनीहरू २०१ वटा सवारीसाधनमार्फत यात्रा गरिरहेका छन्, जसमा ८३ बस, १४ मिडियम मोटर भेहिकल र १०४ लाइट मोटर भेहिकल समावेश छन्।
अधिकारीहरूले जनाएअनुसार, ११५ वटा सवारीसाधन बालटालतर्फ जाने काफिलामा रहेका छन् भने ८६ वटा सवारीसाधन पहलगाम आधार शिविरतर्फ गइरहेका छन्। यात्रालाई सुरक्षित र व्यवस्थित बनाउन पुलिस, केन्द्रिय रिजर्भ पुलिस बल (सीआरपीएफ) तथा अन्य सुरक्षा निकायका सुरक्षाकर्मीहरूलाई बहुस्तरीय सुरक्षा व्यवस्थासहित परिचालन गरिएको छ। ५७ दिनसम्म सञ्चालन हुने यस वर्षको श्री अमरनाथ तीर्थयात्रा आगामी २८ अगस्तमा सम्पन्न हुनेछ।
उल्लेखनीय छ, शुक्रबार दोस्रो जत्था प्रस्थान गरेसँगै पछिल्ला दुई दिनमा जम्मूस्थित भगवती नगर यात्री निवासबाट वार्षिक श्री अमरनाथजी यात्राका लागि कश्मीर उपत्यकातर्फ प्रस्थान गर्ने तीर्थयात्रीहरूको कुल संख्या ८,६८७ पुगेको छ।
---------------
हिन्दुस्थान समाचार / भवानी थामी
05 Jul 2026
