कोलकाता, 03 जुलाई (हि.स.)। तृणमूल कांग्रेसका राष्ट्रिय महासचिव एवं डायमण्ड हार्बरका लाेकसभा सांसद अभिषेक ब्यानर्जीलाई आवाजको नमूना उपलब्ध गराउने मुद्दामा शुक्रबार कलकत्ता उच्च न्यायालयबाट तत्काल राहत प्राप्त हुन सकेन। अदालतले मुद्दाको तत्काल सुनुवाई गर्न गरिएको अनुरोध अस्वीकार गर्दै मङ्गलबारअघि यस विषयमा कुनै सुनुवाई नहुने स्पष्ट गरेको छ। अदालतले अभिषेकलाई मङ्गलबार पुनः यस मुद्दातर्फ पीठको ध्यानाकर्षण गराउन निर्देशन दिएको छ, त्यसपछि सुनुवाईको मागबारे विचार गरिनेछ।
शुक्रबार अभिषेक ब्यानर्जीका अधिवक्ताहरू सव्यसाची बन्द्योपाध्याय र अयन भट्टाचार्यले न्यायमूर्ति सौगत भट्टाचार्यको पीठमा तत्काल सुनुवाईको माग गरेका थिए। उनीहरूले यसअघि अर्को पीठले यस मुद्दाको सुनुवाई हुने सङ्केत गरिसकेको भन्दै छिटो सुनुवाई आवश्यक रहेको तर्क गरेका थिए। तर न्यायमूर्तिले मङ्गलबारअघि कुनै पनि निवेदनमाथि सुनुवाई सम्भव नरहेको बताए।
यो मुद्दा विधानसभा निर्वाचन प्रचारका क्रममा अभिषेक ब्यानर्जीले कथित रूपमा दिएको डीजे बजाउने सम्बन्धी अभिव्यक्तिसँग जोडिएको छ। उक्त अभिव्यक्तिलाई लिएर उनीमाथि भड्काऊ टिप्पणी गरेको आरोप लगाइएको छ। यस विषयको अनुसन्धान राज्य पुलिसको अपराध अनुसन्धान विभाग (सीआईडी) ले गरिरहेको छ। अनुसन्धान एजेन्सीका अनुसार, अनुसन्धानलाई अघि बढाउन अभिषेक ब्यानर्जीको आवाजको नमूना आवश्यक छ। यही मागसहित सीआईडीले विधाननगर अदालतमा निवेदन दायर गरेको थियो। अदालतले ३० जूनमा अभिषेक ब्यानर्जीको आवाजको नमूना लिन अनुमति दिएको थियो। तर तोकिएको मितिमा उनी अदालतमा उपस्थित नभई उक्त आदेशविरुद्ध कलकत्ता उच्च न्यायालयमा रिट दायर गरेका थिए।
उच्च न्यायालयमा दायर निवेदनमा अभिषेक ब्यानर्जीले सम्बन्धित अडियोमा रहेको आवाज आफ्नो नै भएको कुरा आफूले कहिल्यै अस्वीकार नगरेको दाबी गरेका छन्। यस्तो अवस्थामा आवाजको पहिचानबारे कुनै विवाद नभएकाले पुनः आवाजको नमूना लिनु आवश्यक नरहेको उनको तर्क छ।
यसअघि पनि यही मुद्दामा न्यायमूर्ति तीर्थंकर घोषको पीठमा तत्काल सुनुवाईको माग गरिएको थियो। त्यसबेला अदालतले अनुसन्धान एजेन्सीले कसरी अनुसन्धान गर्ने र कुन प्रमाण आवश्यक पर्छ भन्ने निर्णय अदालतको काम नभएको उल्लेख गर्दै तत्काल हस्तक्षेप गर्न अस्वीकार गरेको थियो। साथै, मुख्य मुद्दा जुन पीठमा विचाराधीन छ, सोही पीठमा अभिषेकले आफ्नो निवेदन प्रस्तुत गर्न सक्ने अदालतले जनाएको थियो।
अब यस मुद्दाको अर्को महत्त्वपूर्ण सुनुवाई मङ्गलबार हुने सम्भावना छ। यता विधाननगर अदालतले 8 जुलाईमा अभिषेक ब्यानर्जीलाई व्यक्तिगत रूपमा उपस्थित हुन निर्देशन दिएको छ। अदालतको आदेशअनुसार, सोही दिन मजिस्ट्रेट तथा फरेन्सिक विशेषज्ञहरूको उपस्थितिमा सीआईडीले उनको आवाजको नमूना सङ्कलन गर्ने प्रक्रिया पूरा गर्नेछ। त्यसैले मङ्गलबार उच्च न्यायालयमा हुने सम्भावित सुनुवाईलाई यस मुद्दाको कानुनी दिशाका लागि महत्त्वपूर्ण मानिएको छ।
---------------
हिन्दुस्थान समाचार / भवानी थामी
05 Jul 2026
